Sentru Kardiaku Lahane sei funsiona iha tempu badak
DILI, 01 jullu 2024 (TATOLI) – Diretór Nasionál Apoiu Servisu Opsitalár iha Ministériu Saúde, Carlos de Carvalho Guterres, informa posibilidade iha fulan-Outubru ka novembru, Sentru kardiaku Lahane funsiona atu halo tratamentu ba pasiente moras fuan iha Timor-Leste.
“Ita ko’alia kona-ba prosesu kardiaku ne’e enjerál, la’o nafatin, maibé posibilidade fulan-Outubru ka novembru mak sentru kardiaku iha Lahane funsiona ona atu halo tratmentu ba pasiente moras fuan iha ita-nia rain, tanba rekursu umanu sufisiente”, Carlos de Carvalho Guterres dehan iha nia kna’ar fatin Caicoli, ohin.
Nia dehan, fasilidade sira hanesan kama no mós seluk tan disponivel ona, maske balun sei responde ho fazeadamente. Mákina fuan mak sei halo akizisaun iha nasaun Jerman.
“Buat ne’ebé mak iha ona, ita utiliza daudaun mak ita kompleta tan, labele dehan kompletu tiha mak ita utiliza, ezemplu; ita halo uma ida so ema sira ho modal boot mak dehan harii hotu mak hela, maibé ita ho modál kiik halo daudaun hela depois mak ita kompleta neneik, entaun ida-ne’e mak ami esforsu hela”, nia hateten.
Nia esplika, Governu bainhira utiliza ona sentru kardiaku iha Lahane mak sei redús pasiente moras fuan ba rai liur hodi halo tratamentu saúde.
“Bainhira ita utiliza ona signifika ita mós redús ona ita-nia pasiente moras fuan ba rai liur, maibé ita haree ba kazu todan, ita sei haruka ba nafatin atu médiku sira avalia katak saida mak ita atu prepara ba oin”, nia subliña.
Nia relata, Diresaun Nasionál Apoiu Servisu Opsitalár, husi janeiru to’o juñu, halo ona transferénsia pasiente ba rai liur hamutuk 115.
“Hosi janeiru to’o juñu, ita transfere ona pasiente hamutuk 115 inklui ho pasiente 2023 nian ne’ebé mak halao hela tratamentu iha rai liur hamutuk 15, ne’ebé totál 130, hosi númeru ne’e iha nasaun Sigapura pasiente hamutuk 26, Malázia 50 no Indonézia hamutuk 54 ne’ebé afeta liu ba moras fuan no kankru.
Nia konta, hosi tinan ida-ne’e, pasiente ne’ebé halo transferénsia ba rai liur lakon vida iha na’in hitu ne’ebé mak lori fila fali mai Timor-Leste.
Jornalista : Felicidade Ximenes
Editór : Zezito Silva
