VIQUEQUE, 01 Jullu 2024 (TATOLI)- Leonel Training Center (TLC) loke formasaun lian inglés no komputadór iha suku Matahoi,Postu Administrativu Uatulari, Viqueque, hodi fasilita joven no estudante sira hodi kapasita aan, nune’e bele kompete iha merkadu traballu.
Biban ne’e, Autoridade Uatulari dezafia joven no estudante sira atu partisipa formasaun sira hanesan inglés no komputadór.
” Tempu agora ne’e ha’u haree buat ida komputadór no lian sai rekezitu ba ita, atu asesu ba servisu ka compete iha kampu traballu ruma tenke iha koñesementu. Nune’e husu joven no estudante sira atu aproveita oportunidade hodi tuir kursu atu ne’e bele hetan kampu traballu iha futuru,” Reprezentante Administradór Postu Administrativu Viquequ-Vila, João Lemos, ba jornalista sira iha serimónia lansamentu formasaun.
Iha postu Uatulari ema loke formasaun ba lian Inglés iha fatin haat, maibé joven sira lakohi aproveita ba apreende, tanba ne’e autoridade lokál no veteranu sira kontinua enkoraja joven sira aprende barak.
“Se la’e joven sira ema tuir konkursu vaga ruma, husu inglés lahatene, hafoin ema haruka loke komputadór no loke microsoft word la hatene, oinsá maka bele asesu ba kampu servisu. Ho ida-ne’e mak ami fó korajen ba joven no estudante sira aprende no aprende”, nia enkoraja.
Iha biban ne’e, Xefe Suku Matoi, Antonio Amarál, husu agradese ba inisiativa sentru formasaun, Leonel Training Center (TLC) ne’ebé mak voluntáriu loke fomasaun komputadór no lian Inglés ba joven no estudante sira iha suku Matahoi.
“Ha’u sei fó hatene ba ha’u-nia xefe aldeia sira atu orienta sira-nia oan sira mai aprende lian Inglés no komputadór hodi utiliza iha futuru. Ha’u mós sei fó hatene Pesoal Apoiu Servisu Suku (PASS) suku Matahoi nian, atu hola parte formasaun ida-ne’e. Tanba sira presiza koñese komputadór hodi hakerek relatóriu no dadús sira ba sitema”, nia afirma.
Biban ne’e, Diretór Leonel Training Center (TLC), Adelino Fernandes, hateten TLC hahú loke formasaun ba joven tanba hakarak fasilita joven sira labele ba do’ok hodi aprende, maibé iha postu bele aprende komputadór no lian Inglés.
“Ami loke formasaun ida-ne’e ho voluntáriu servisu hanorin ita-nia joven sira tanba ita hela iha área rurál susar asesu ba formasaun sira hanesan ema loke iha Dili. Maibé ita haree iha ita-nia postu laiha formasaun ruma. Ho hanoin ida-ne’e maka ami inisia formasaun ne’e ba estudante no joven sira-ne’ebé interse hakarak aprende. Objetivu, loke formasaun naun formal ne’e, atu hasa’e foinsa’e sira-nia koñesementu liuhusi lina Inglés no komputadór”, Diretór ne’e afirma.
Tuir dadús estudante sira-ne’ebé partisipa iha formasaun na’in-50, Formasaun sei la’o durante fulan-tolu no daudaun ne’e kontinua simu joven no estudante sira-ne’ebé iha interese aprende ba área komputadór no lian inglés iha suku Matahoi.
Iha lansamentu formasaun lian inglés no komputadór ne’e hetan partisipasaun husi Diretór Adjuntu Sekundáriu (SGJ) Sabika Besi Kulit, Paulo Hornai, Komadante Polísia Nasional Timor Leste (PNTL) eskuadra postu Uatulari, Veteranu, autoridade lokál no estudante sira.
Jornalista : Vitorino Lopes da Costa
Editór : Florencio Miranda Ximenes
