DILI, 02 jullu 2024 (TATOLI)-Ministériu Edukasaun, hamutuk ho Banku Dezenvolvimentu Aziatíku no INDMO,I.P, tersa ne’e, fó ona formasaun ba dirijente eskola sekundária tékniku vokasionál (ESTV) hamutuk ema 32 kona-ba dezenvolvimentu planu estratéjiku eskolár.
“Tuir kurríkulu nasionál ita-nia ESTV kuandu konklui no hetan sertifikasaun maibé depois tempu naruk nia-laran ne’e ita seidauk priense kritériu, ida tuir padraun INDMO, I.P nian,” Diretór Jerál Ensinu Sekundáriu Jerál, Deolindo da Cruz, hateten bainhira halo abertura ba formasaun ne’ebé maka hala’o iha salaun INFORDEPE Balide, tersa ne’e.
Tuir nia ho formasaun ne’ebé maka daudaun ne’e ADB no Instituisaun Nasionál Dezenvolvimentu Mão-de-obra (INDMO, I.P), oferese ba dirijente eskola idaidak atu halo jestaun administrasaun liuhosi planu estratéjiku eskolár nian.
Sertifikasaun hosi INDMO, I.P ne’e importante tebes atu hadi’a kualidade edukasaun iha eskola idaidak, Nune’e ho apoiu konsultór na’in rua hosi ADB nian sei tulun ESTV sira atu elabora sira-nia planu estratéjiku iha futuru.
“Importante enfatiza momentu ida-ne’e ho kompromisu Sekretária Estadu ESJ no ESTV nian, hadi’a eskola sekundáriu, hodi fó posibildade ba ita-nia joven sira hodi hetan asesu. Kompromisu ida-ne’e define avansu edukasaun tékniku vokasionál iha ita-nia rai. Importánsia hosi apoiu ADB nian no envolvimentu parte interesante sira mós fó garantia ba estabelesimentu liña koordenasaun ida entre ME no INDMO, I.P. hodi dezenvolve kurríkulu ba tékniku-vokasionál,”nia dehan.
Nune’e mós atu halo aliñamentu ba sistema sira entre Sentru Formasaun Profisionál no ESTV sira importante tebes atu emprega estudante sira tuir nesesidade merkadu ka indústria iha rai-laran.
“Aliñamentu ida-ne’e sei garante katak ita-nia estudante sira preparadu atu hasoru dezafiu sira iha futuru. Ha’u fiar maka’as katak, ho orientasaun husi konsultór sira husi ADB no kompromisu husi ita hotu, ita sei bele kria ambiente aprendizajen ida ne’ebé la’ós de’it kapasita ita nia estudante sira ho habilidade tékniku no vokasional, maibé mós prepara sira ba merkadu traballu,” nia tenik.
Diretora Banku Dezenvolvimentu Aziatiku (ADB), Stefania Dina hateten, planu estratéjiku sai nu’udar fatór importante ba susesu institusionál hodi forñese roteiru hodi alkansa meta organizasaun nian no referénsia ba progresu sira.
“Iha kontestu TVET nian, iha planu estratéjiku ne’ebé di’ak, nu’udar konkista ba sistema jestaun kualidade ida-ne’ebé forte, fasilita ho hadi’a promove kultura,” nia dehan.
ADB ho INDMO no Ministériu Edukasaun, foinlalais ne’e halo ona vizita bá eskola tékniku vokasionál selesionesadu balun, hasoru situasaun kritíku ne’ebé persiza atu fó atensaun sériu hodi dezenvolve di’akliután.
“Dahuluk mak nesesidade ba hasai kapasidade subtansiál entre edukadór sira atu implementa treinamentu formasaun bazea ba kompeténsia ho efetivu. Daruak eskola barak iha defisiénsia boot ba ekipamentu esensiál sira hanesan mákina iha eskola sira. Tolu nesesidade ba reabilitasaun komprensivu ba dezeñu ofisina nian hodi kumpre, padaraun seguransa, no optimiza ambiente aprendijazén,” nia esplika.
Nia dehan ADB ninia programa asisténsia tékniku ne’ebé hanaran suporta dezenvolvimentu umanu no sosiál iha Sudeste Aziátiku, ho objetivu ida maka atu responde ba dezafiu ne’ebé iha, Nune’e Ministériu Edukasaun nia estratéjia mak hili ona ESTV sia ho área espesializada iha konstrusaun sivil, automekánika no agrikultura.
“Ho ida-ne’e ita iha objetivu tolu, primeiru mak atu tulun instituisaun sira atu dezenvolve planu estratejiku sira, ida-ne’ebé komprensivu. Segunda mak introdúz no entegra metodolojia formasaun bazea ba kompeténsia modulár. Terseiru mak atu hala’o planu asaun hodi prepara eskola sira ba prosesu akreditasaun ho INDMO,” nia hateten.
Diretora Ezekutiva, Institutu Nasionál Dezenvolvimentu Mão-de-Obra (INDMO, IP), Isabel Fernandes, hateten workshop ne’e importante tebes ba ESTV sira atu oinsá sira bele dezenvolve planu estratéjiku iha kada instituisaun.
“Iha planu estratéjiku ne’e ita haree saida mak ita bele halo no nia prioridade ba saida, iha kurtu prazu, médiu prazu no longu prazu, ida ne’e importante tebes tanba sira bele envolve ninia kuadru sira ne’ebé mak iha kada instituisaun, no planu estratéjiku ida ne’ebé mak responde mós ba demanda merkadu nia iha nivel nasionál no internasionál,” nia teniktan.
Jornalista : Osória Marques
Editór : Agapito dos Santos
