iklan

NASIONÁL, INTERNASIONÁL, DILI, HEADLINE, POLÍTIKA

Horta hala’o vizita Estadu bá Moçambique-Angola hodi hametin kooperasaun bilaterál

Horta hala’o vizita Estadu bá Moçambique-Angola hodi hametin kooperasaun bilaterál

Prezidente Repúblika, J. Ramos-Horta ho delegasaun hala'o viázem ba Moçambique. iha Aeroporto Nicolau Lobato Dili, tersa (02/07). Imajen Tatoli/Egas Cristóvão

DILI, 02 jullu 2024 (TATOLI) – Prezidente Repúblika (PR), José Ramos Horta, tersa ne’e, hala’o vizita ofisiál Estadu nian ba Repúblika Mozambique no Repúblika Angola, husi loron 3 to’o 10 Jullu 2024. Vizita hirak-ne’e ho objetivu atu hametin relasaun diplomátika, promove kooperasaun, no hametin relasaun bilaterál ho nasaun Lusófonu sira.

Durante vizita ba Mozambique husi loron 3 to’o loron 7 Jullu, Prezidente Ramos Horta sei hala’o sorumutu Tête-à-Tête ho Prezidente Mozambique,  Filipe Jacinto Nyusi. Prezidente sei partisipa iha sorumutuk bilaterál sira, tuir mai ho asinatura akordu balun.

“Prezidente nia programa iha Mozambique sei inklui mós tau koroa aifunan iha Prasa Erói nian, simu Xave Sidade Maputo nian, hasoru ho Prezidente Asembleia Repúblika Mozambique nian, Esperança Bias, atende Banquete Estadu iha Palásiu Ponta Vermelha, fó palestra iha Universidade Eduardo Mondlane kona-ba “Timor-Leste, Rejiaun no Mundu,” no vizita Sentru Análize Estratéjika CPLP nian,” tenik iha nota ne’ebé Agência TATOLI asesu husi media Palásiu Prezidensiál Dili.

Prezidente Repúblika, J. Ramos-Horta ho delegasaun hala’o viázem ba Moçambique. iha Aeroporto Nicolau Lobato Dili, tersa (02/07). Imajen Tatoli/Egas Cristóvão

Aleinde ne’e, Prezidente Ramos Horta sei halo viajen ba Luanda, Angola, husi loron 8-10 fulan-jullu no iha Angola programa sira mak hanesan, partisipa iha serimónia estadu, halo enkontru bilaterál no sorumutu Tête-à-Tête ho Prezidente Angola, João Lourenço.

Nune’e, Prezidente Ramos Horta sei hasoru mós ho Vise-Prezidente Angola, Esperança da Costa, no Prezidente Asembleia Nasionál, Carolina Cerqueira.

“Prezidente sei fó palestra ida iha Akademia Diplomátika Venâncio de Moura, vizita Akademia Polísia, no atende serimónia ida iha fasilidade foun Embaixada RDTL nian iha Angola,” tenik iha nota ne’e.

Vizita estadu sira ne’e hatudu Timor-Leste nia kompromisu atu haforsa ninia relasaun internasionál no haburas kooperasaun iha Komunidade Nasaun Lian Portugués nian, CPLP.

Prezidente hein atu halo diskusaun produtivu kona-ba interese komún, inklui kooperasaun ekonómika, interkambiu kultural, no seguransa rejionál.

Timor-Leste nia relasaun ho Angola no Mozambique metin iha istória komún hanesan antigas kolónias Portugésa no membru CPLP. Vizita hirak-ne’e reprezenta pasu signifikativu ida atu haforsa ligasaun no esplora dalan foun sira ba kolaborasaun.

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!