iklan

DESPORTU, DILI, HEADLINE

Manán Aimou FC 3-0, Laisorulai FC susesu hakaat ba semi-finál iha Kopa Xanana

Manán Aimou FC 3-0, Laisorulai FC susesu hakaat ba semi-finál iha Kopa Xanana

Jogu Futebol Kopa Maun Boot Kayrala Xanana Gusmão 2024, Laisoru Lai F.C kontra Maubale F.C, iha estadiun Munisípal Dili, segunda (13/05). Imajen Tatoli/Francisco Sony

DILI, 02 jullu 2024 (TATOLI) – Ekipa husi Munisípiu Baucau ho naran istimadu Laisorulai FC susesu iha nia jornada ikus hodi manán ekipa istimadu husi Munisipiu Viqueque Aimou FC ho rezultadu 3-0. Nune’e ekipa identiku makasa’e ne’e tenke ultrapasa ona ba semi-finál kopa Maun Boot Kay Rala Xanana Gusmão.

Duelu entre ekipa rua, hala’o iha Estádiu Munisipál Dili, tersa loraik ne’ebé lidera husi árbitru prinsipál Eufrasio da Silva, juiz liña Filomeno da Silva, Peregrino dos Reis no árbitru rezerva Henrique Pereira.

Bainhira jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian oinsa bele hatama golu tanba jogu ne’e hanesan jogu siensitivu sé mak lakon tenke sai ona.

Laisorulai ho forsa ne’ebé makaas hala’o jogu tuir nia hakarak, maibé Aimou la fó fatin, lansa kontra no atake hasoru Laisorulai maibé Laisorulai iha forsa ne’ebé makaas.

Ho forsa ne’ebé Laisorulai iha hatudu duni prova, iha minutu 6 jogadór Filipe da Costa (22) lansa ona golu primeiru hodi muda rezultadu ba 1-0.

Golu ne’e aumenta liutan Laisorulai nia forsa hodi hatudu jogu ne’ebé bonitu iha kampo laran. Adeptus sira mós la tur hakmatek, hakilar ho lian oioin fó suporta másimu ba sira nia ekipa favoritu.

Aimou lansa kontra no atake maibé esforsu hotu hela de’it hanesan esforsu tanba defeza Laisorulai la fó fatin, nune’e Aimou tenke hela ho rezultadu zero.

Laisorulai lakoi hela de’it ho rezultadu ne’ebé iha ona, sira nafatin esforsu nune’e iha minutu 31 jogadór Pedro da Costa (7) lansa tan golu segundu muda rezultadu ba 2-0. Golu ne’e halo Aimou nia mentalidade jogu tun ba-bebeik no Laisorulai domina bola.

Avansadu Aimou buka meiu hotu oinsa bele sobu defeza Laisorulai maibé la konsege tanba jogadór Laisorulai halo blokeia metin.

Maske manán ona jogu ne’e, Laisorulai iha ambisaun ne’ebé boot atu aumenta tan golu, mehi ne’ebé Laisorulai iha la hela de’it hanesan mehi tanba iha minutu 37 jogadór Pedro da Costa susesu tan iha nia jornada hodi marka golu ikus muda rezultadu ba 3-0. Golu ne’e hanesan golu ikus ba ekipa rua iha minutu primeira parte.

Hakat ba segunda parte, Aimou halo mudansa ba nia jogu maibé la konsege sobu nafatin Laisorulai nia jogu. Susar liutan ba Aimou atu halo golu.

Laisorulai tenta nafatin oinsa aumenta golu iha segunda parte ne’e, maibé la konsege tanba Aimou halo blokeia metin iha grande área Aimou nian. Tanba ne’e iha minutu segunda parte ekipa rua lansa de’it kontra no atake ba malu maibé la rezulta golu to’o minutu jogu termina vitoria hela ba Laisorulai hodi avansa ba semi-finál no Aimou tenke elemina ona hodi hein fali jogu seluk iha tinan oin.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!