VIQUEQUE, 02 jullu 2024 (TATOLI)- Progresu konstrusaun fíziku ba projetu reabilitasaun rezidénsia Autoridade Munisípiu Viqueque (PAM) no morru no jardín ne’ebé resposabiliza husi empreza Peaceful Unip, Lda, konsege atinje ona 70.12%.
Tuir Jestór Empreza Peaceful Unip, Lda, Pascoal Vital, esplika, projetu reabilitasaun rezidénsia PAM Viqueque item tolu maka hanesan morru haleu rezidénsia, reabilita uma no jardín maka dadauk ne’e traballadór empreza Paeceful sira kontinua hala’o servisu obra rezidénsia.
“Moru ami konstrui hotu ona no falta mak monta lampu, reabilta uma nian daudaun ami sei taka keramik iha uma laran, depois hotu kontinua monta janela inklui odamatan tanba materiál mós rai ona iha fatin servisu no jardín mós ami sei prosesu servisu”, Jestór Empreza Peaceful Unip, Lda, Pascoal Vital, hateten ba Agência Tatoli, iha fatin konstrusaun, ohin.
Durante ne’e, empreza hasoru hasoru mak uma tanba uma ne’e antigu ne’ebé traballadór sira tenke asegura uma nian orijinál nomós klíma udan foin lalais ne’e.
“Ami kontinua esforsu liután hodi ezekuta servisu sira-ne’e to’o halo ramata, tuir tempu kontratu ne’ebé PAM fó ba ami katak to’o loron 30 Novembru 2024, ami tenke konklui obra, maibé ami fiar la to’o durasaun tempu ne’ebé fó ne’e ami finaliza ona”, nia garante.
Empreza Peaceful Unip, Lda kontrata traballadór servisu ba reabilitasaun rezidénsia PAM Viqueque na’in-38 ne’ebé kompostu husi soldadura, eletrisidade, badaen no seluk tán.
Reabilitasaun rezidénsia PAM Viqueque hahú implementa iha fulan-Jullu 2023 ho totál orsamentu hamutuk $470,225.91.
Jornalista : Vitorino Lopes da Costa
Editór : Florêncio Miranda Ximenes
