Reprezentante povu husu EDTL, E.P tau atensaun ba sentru venda pulsa eletrisidade
DILI, 02 jullu 2024 (TATOLI)—Reprezentante povu iha uma fukun Parlamentu Nasionál liuhusi Deputadu KHUNTO, Luis Roberto da Silva, preokupa sistema sentru venda pulsa eletrisidade no husu ba Eletrisidade de Timor-Leste Empreza Públika (EDTL, E.P) atu tau atensaun.
“Preokupa tebe-tebes, ho sistema token enérjia ka sistema faan pulsa enérjia eletrisidade nian, ne’ebé kuaze tinan ida-ne’e tomak sempre falla hela de’it,” nia hato’o iha reuniaun plenária Parlamentu Nasionál, tersa ne’e.
Horisehik, nia dehan, EDTL, E.P aviza ba públiku katak sistema faan pulsa ka token enérjia normaliza hikas ona maibé realidade ne’ebé ema hotu enfrenta direta sistema iha sentru venda sira iha teritóriu tomak sei kontinua eror hodi difikulta ba kliente sira.
Ho ida ne’e, nia husu ba Governu liuhusi ministériu relevante atu identifika lalais ninia kauza ne’e iha ne’ebé, hodi bele normaliza hikas sistema ne’e.
Antes ne’e, Deputadu KHUNTO husu EDTL, E.P tau atensaun atu eletrisidade labele mate-lakan, tanba iha fulan-setembru tinan ne’e Amu Papa Francisco sei hala’o vizita Estadu no pastorál iha Timor-Leste, nune’e husu atu eletrisidade labele mate beibeik.
Iha reuniaun plenária ohin, reprezentante Governu liuhusi Vise Ministru ba asuntu Parlamentár, Adérito Hugo da Costa, la marka prezensa, no parte tékniku sira rejista de’it preokupasaun Deputadu sira-nian hodi enkamina ba entidade relevante.
Jornalista : Nelson de Sousa
Editór : Cancio Ximenes
