Antigu Prezidente Autoridade Munisípiu Bobonaro simu pose nu’udar xefe departamentu
BOBONARO, 01 jullu 2024 (TATOLI) – Antigu Prezidente Autoridade Munisípiu Bobonaro, Ernesto de Oliveira Barreto, simu pose nu’udar xefe departamentu jestaun merkadu iha autoridade munisipál Bobonaro.
Vise-Ministru Administrasaun Estatál (MAE), Jacinto Rigoberto louva ho antigu prezidente autoridade ne’ebé ho espíritu serbí.
“Ida-ne’e ha’u fiar katak sé Bobonaro hanesan ne’e no munisípiu hotu-hotu mak hanesan hotu, ha’u fiar katak Timor ne’e sei ba oin, maibé ida-ne’e mak referénsia, servisu ho unidade, lalika haree ba kargu, maibé haree ba saida mak atu kontribui, hanesan desizaun ne’ebé señór Ernesto halo. Ha’u fiar katak Bobonaro bele prepara ba kompete ba kámara munisípiu iha podér lokál,” Jacinto Rigoberto, hato’o felisitasaun ne’e liuhusi serimónia pose ba xefe departamentu no xefe seksaun lokál sira hamutuk 63 hodi kompleta estrutura autoridade munisipál Bobonaro no autoridade postu administrativu neen, iha salaun Maria Tapo, segunda ne’e.
Nia husu emposadu-sira atu tau-matan no hala’o governu ninia programa kona-ba reforma administrasaun públika iha komponente tolu hanesan; jestaun dezenvolvimentu rekursu umanu, promove líder forte no funsionáriu públiku kapasitadu no reforsa sistema méritu atubele garantia ba ema los iha fatin ne’ebé loos.
Komisáriu Komisaun Funsaun Públika, José Telo Soares Cristovao, husu ba emposadu-sira labele sente previleiju ho kargu ne’ebé simu, tanba kargu ne’e nu’udar opurtunidade no responsabilidade ida atu serbí povu.
Nia fó hanoin ba emposadu sira atu servisu ho onestidade no intregridade, tanba kargu ne’ebé simu la’ós oportunidade, maibé ne’e nu’udar responsabilidade hodi servisu povu munisípiu Bobonaro.
“Ohin ita-boot sira halo juramemtu ne’e atu serbí de’it ba povu no rai ida-ne’e, laiha servisu ba grupu A B ou C,h otu-hotu serbí de’it ba rai ida-ne’e, hodi dadus Komisaun Funsaun Públika nia 93% ema hotu ho avaliasaun muitubom,” nia katak.
Prezidente Autoridade Munisipál Bobonaro, Alexandrino Pires, espera ho estrutura xefe departamentu no xefe seksaun foun sira ba ba oin bele presta atendimentu públiku di’ak liután hodi dezenvolve munisípiu Bobonaro.
“Imi juramentu la’ós jura ba grupu no polítika, imi jura ba estadu no povu, atu sai servidór povu, ita-nia diferente polítika sim, mas iha administrativu laiha diferente, ita só sai servidór ba povu Bobonaro,” nia fó hanoin.
Enkuantu Autoridade Munisipál Bobonaro nu’udar pesoa koletiva direitu públiku, dotada autonomia administrativa, autonomia finanseira, ne’ebé sujeita no tutela ba Ministru Administrasaun Estatál no regula ho estatutu Autoridade Munisipál no Grupu Tékniku Interministeriál bá Desentralizasaun Administrativa, aprovadu hosi Dekretu-Lei númeru 3/2016, 16 marsu, ho redasaun aprovadu hosi Dekretu-Lei númeru 23 Novembru.
Notísia relevante: Estrutura foun Autoridade Bobonaro presiza marka diferensa
Jornalista: Sérgio da Cruz
Editór: Evaristo Soares Martins
