Autoridade Baucau – Igreja hahú diskute partisipasaun sarani iha vizita Papa Francisco
BAUCAU, 02 jullu 2024 (TATOLI) – Autoridade Administrasaun Munisipál hamutuk ho Igreja iha munisípiu Baucau hahú dskute kona-bá partisipasaun sarani husi munisípiu refere iha ámbitu vizitasaun Papa Francisco iha fulan-setembru ne’e.
Preparasaun sira-ne’ebé halo mak hanesan fó-sai despaxu ministeriál númeru 49/M-MAE/ V/ 2024, loron 31 maiu kona-ba konstitusaun korteza komisaun lokál vizita sua santidade Papa Francisco mai Timor-Leste hanesan halo rejistrasaun tuir kada parókia sira iha munisípiu Baucau ne’ebé hahú anusia ona tuir igreja sira.
“Rejistu hahu tiha ona, parókia sira-ne’e kada loron-domingu avizu sarani sira-ne’ebé hakarak, idak-idak ba rejistu maibé tenke lori ho kartaun eleitorál no billete identidade,” Prezidente Autoridade Munisipál Baucau , Veneranda Lemos hateten iha Vila nova, tersa ne’e.
Tuir planu ne’ebé fo-sai husi nasionál hanesan sidadaun husi kada munisípiu sei partisipa hamutuk rihun 50 maibé presiza halo rejistrasaun tuir parókia idak-idak ne’ebé tuir planu sei partisipa durante loron-tolu, 09-11 Setembru.
Bainhira rejistrasaun finaliza sei halo ajustamentu ba dadus inklui kontinua prepara transporte no akomodasaun ba sarani sira.
“Sarani hotu-hotu, atu ferik katuas, joven, ema ho difisiénsia sira hotu hakarak tuir misa Amu Papa rasik selebra ne’e tenke rejista,” Veneranda Lemos akresenta.
Parde Parókia Santa Terezinha Quelicai, Justiano de Sousa, hateten, hafoin simu orientasaun husi autoridade munisipiu, parókia Quelicai konsulta ho autoridade postu no suku 15 kona-ba preparasaun vizitasaun Papa Francisco mai Timor-Leste.
Enkuantu atualmente iha postu administrativu Quelicai kontinua loke rejistrasaun liuhusi Parókia Santa Terezinha nune’e bainhira finaliza sei aprezenta dadus ba autoridade munisipál.
“Ami sei halo rejistrasaun, segundu enkontru mak halo konfirmasaun,” Padre Justiano hateten.
Tuir despaixu númeru 49/M-MAE/V/2024 fó kompeténsia ba Komisaun Organizadora hanesan autoridade munisípiu hamutuk ho Igreja fó-sai regras atu regula kona-ba movimentasaun husi Baucau ba fatin serimónia Tasi Tolu, Dili.
Alende ne’e, sarani sira-ne’ebé rejista tenke iha kondisaun saúde di’ak no fó espasu ba maluk ema ho defisiénsia sira bainhira responsável husi família.
Partisipante sira sei hetan uniforme kamizola no kartaun husi komisaun organizadora, durante prosesu movimentasaun sei akompaña husi Komandante Polísia Eskuadra, Padre Parókia, Xefe Sentru Saude inklui Administradór Postu.
Kona-ba fatin, sarani husi munisípiu Baucau sei konsentra iha Hera no bandu atu iha vizita husi família no sei hetan pasa revista husi parte seguransa hafoin ba fatin serimónia iha Tasi Tolu.
Jornalista : Natalino Belo
Editór : Evaristo Soares Martins
