iklan

EKONOMIA, BAUCAU, HEADLINE, MUNISÍPIU

Autoridade suku husu Governu solusiona kondisaun estrada Fatulia

Autoridade suku husu Governu solusiona kondisaun estrada Fatulia

Xefe suku Fatulia, Angelino Moisés Perreira. Imajen Agência TATOLI/Natalino Belo.

BAUCAU, 01 jullu 2024 (TATOLI) – Autoridade suku Fatulia, postu administrativu Venilale, munisípiu Baucau, husu Governu solusiona estrada ne’ebé kompañia abandona.

Xefe Suku Fatulia, Angelino Moises Pereira, esplika, projetu reabilitasaun estrada diresaun referida husi área Nunubai to’o aldeia Ossouaque ho distánsia kilómetru 10.300 ne’ebé kompañia responsável husik hela dezde tinan 2019 to’o agora seidauk finaliza.

“Husu nafatin atu bele reativa fali projetu estrada ne’e, tanba komunidade presiza duni hanesan transporta nesesidade báziku no produtu ba merkadu,” Xefe suku Fatulia hateten iha Vila Nova, segunda ne’e.

Angelino Pereira, konsidera, kondisaun estrada iha Fatulia kategoria grave nune’e difikulta movimentasaun transporte nune’e bainhira kontinua reabilita sei fó benefísiu ba populasaun sira iha suku Fatulia no postu administrativu seluk, hanesan postu Vemasse no Ossu, munisípiu Viqueque.

Enkuantu projetu refere Governu liuhusi Ministériu Obra Públika (MOP) fó kontratu ba kompañia lokaá ho naran Ruvic Construction iha tinan 2016, maibé to’o ohin loron seidauk finaliza, tanba abandona.

“Komunidade presiza duni estrada atubele transporta sira-nia produtu ba merkadu,” Angelino Pereira argumenta.

Diretór Servisu Munisipál Obra Públika Baucau, Agostinho Ximenes, hateten, kompañia responsável ba projeitu referida hahu husik hela projetu iha tinan-2019 no parte Obra Públika Baucau hato’o ona ba nasionál bazea ba kompeténsia nune’e bele solusiona situasaun referida.

“Kompañia loke ona estrada balun no valeta nia pursentu foin atinje de’it 31.01%,” Agostinho Ximenes hateten.

Projetu reabilitasaun estrada iha suku Fatulia responsabilidade husi kompañia Ruvic Construction Unipesoal Lda ho nùmeru kontratu SSS/118/MOPTC-2016, orsamentu husi fundu infraestrutura ho totál $ 4,897,636.09.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!