iklan

NASIONÁL, EKONOMIA, INTERNASIONÁL, DILI, HEADLINE, POLÍTIKA

KM aprova projetu rezolusaun hodi ratifika akordu izensaun vistu TL no Singapura

KM aprova projetu rezolusaun hodi ratifika akordu izensaun vistu TL no Singapura

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (03/07). Imajen Tatoli/Francisco Sony

DILI, 03 jullu 2024 (TATOLI) – Governu liuhusi reuniaun Konsellu Ministru (KM) kuarta ne’e iha Palásiu Governu Dili diskute no halo aprovasaun ba projetu rezolusaun Parlamentu Nasionál hodi ratifika akordu kona-ba Izensaun Vistu entre Repúblika Demokrátika Timor-Leste ho Governu Repúblika Singapura ba Titulár Pasaporte Diplomátiku, Ofisiál ka Servisu no Ordináriu nian.

“Konsellu Ministru aprova projetu Rezolusaun Parlamentu Nasionál, ne’ebé aprezenta husi Vise-Ministra ba Asuntus ASEAN, Milena Maria da Costa Rangel, hodi ratifika akordu kona-ba Izensaun Vistu entre Repúblika Demokrátika Timor-Leste ho Governu Repúblika Singapura ba Titulár Pasaporte Diplomátiku, Ofisiál ka Servisu no Ordináriu nian,” tenik iha nota ne’ebé Agência TATOLI asesu husi media Palásiu Governu Dili.

Akordu ne’e mós vale ba Reinu Tailándia ba Objetivu Turístiku ba Titulár Pasaporte Komún.

Nune’e, Governu husi Sua Majestade Sultaun no Yang Dipertuan husi Brunei Darussalam ba Titulár Pasaporte Diplomátiku no Ofisiál ka Servisu nian.

Alende ne’e, Vise-Ministra ba Asuntus ASEAN, Milena Maria da Costa Rangel, halo mós aprezentasaun ida ba Konsellu Ministrus kona-ba Relatóriu tinan 2024 nian relasiona ho progresu iha implementasaun Roteiru ba Adezaun Timor-Leste hanesan Membru Plenu ASEAN nian.

Durante aprezentasaun, ko’alia-liu kona-ba esforsus ne’ebé hala’o ona hodi kumpre kritériu no objetivus atu adere ba ASEAN, inklui partisipasaun ativa Timor-Leste iha sorumutu oioin órgaun setoriál sira ASEAN nian hanesan observadór.

Vise-Ministra halo pontu situasaun ida kona-ba progresus ne’ebé alkansa ona iha prosesu negosiasaun ne’ebé la’o hela no sira ne’ebé konklui ona, kona-ba akordu oioin no instrumentu vinkulativu seluk ne’ebé presiza.

Milena Rangel mós fornese informasaun detallada kona-ba asaun kapasitasaun sira ne’ebé realiza ona to’o ohin loron, no subliña propriedade no atividade prinsipál sira ne’ebé sei implementa iha futuru hodi garante preparasaun kontínua no aliñamentu Timor-Leste nian ho rekizitus ASEAN.

Iha ambitu ne’e, Konsellu Ministrus mós aprova projetu Rezolusaun Governu, ne’ebé aprezenta mós husi Vise-Ministra ba Asuntus ASEAN, Milena Maria da Costa Rangel, ne’ebé aprova Kontribuisaun ida, ho valor rihun $ 200, ba Sekretariadu Tékniku ASEAN.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!