Komandu PNTL husu adeptu bola kumpre Lei Kódigu Estrada
DILI, 03 Jullu 2024 (TATOLI) – Komandu Polísia Nasionál Timor-Leste (PNTL) husu ba adeptu sira ne’ebé apoia país favóritu iha jogu Kopa Euro 2024 bainhira halo komboiu hodi festeja vitória tenke kumpre regra no Lei Kódigu Estrada nian.
Komandante Jerál PNTL, Komisáriu Jerál Polísia, Henrique da Costa, husu ba adeptu sira, liuliu ida ne’ebé apoia Portugál bainhira hala’o komboiu tenke kumpre regra sira no respeita mós ema seluk ne’ebé uza via públika.
“Ha’u hakarak informa ba públiku, liuliu ba adeptu Portugál nian katak agora Kopa Euro 2024 la’o hela no hahú prepara atu tama ona ba kuartu finál. Husu atu nafatin kumpre regra”, Komisáriu Jerál PNTL hateten iha Bairru Pité.
Nia salienta komandu Polísia la bandu adeptu sira atu fó apoia sira-nia nasaun favórita ne’ebé joga no la proíbe atu halo komboiu, maibé labele haluha katak estrada públiku ne’e ba ema hotu, tanba ne’e presiza atu kumpre regra sira, liuliu respeita ema seluk nia liberdade.
“Iha tempu komboiu karik tenke uza kapasete, iha karta kondusaun, asesoria motór tenke kompletu, labele uza kanu resin, nomós tula malu karik labele liu ema na’in rua, nune’e adeptu sira ne’ebé festeza kontente ida ne’e nafatin kumpre Kódigu Estrada nian, liuhusi hakribit violénsia”, afirma.
Tuir nia, husi informasaun sira ne’ebé Polísia hato’o ne’e, iha tempu komboiu mak adeptu sira la respeita regra. Polísia Tránzitu sei hala’o nia serbisu hodi halo intervensaun ba movimentasaun ne’ebé adeptu sira halo.
“Polísia sei nafatin hala’o nia serbisu atu hatudu katak sidadaun sira la kumpre regra no Lei Kódigu Estrada nian sei aplika sansaun. Maibé komboiu ne’ebé foin lalais adeptu sira halo ne’e hatudu ona kumpre regra sira. Sira la kontra buat ne’ebé hatuur ona iha lei númeru 6/2003 iha artigu 178. Sira uza ona kapasete, ema na’in-rua tula malu iha motór ida, motór sira uza espellu no la uza kanu resin. Ida ne’e di’ak ona no bele festeja duni kontente ne’e hodi halo Dili sai rame liután”, dehan.
Jornalista: Tomé Amado
Editora: Maria Auxiliadora
