DILI, 03 jullu 2024 (TATOLI)- Governu liuhusi Ministériu Negósiu Estranjeiru no Kooperasaun (MNEK) hamutuk ho Uniaun Europeia (UE) realiza semináriu durante loron rua hahú 02 to’o 03 Jullu iha Timor Plaza Dili hodi prepara dokumentu negosiasaun adezaun Timor-Leste nian ba ASEAN.
Semináriu ne’e loke direita husi Vise-Ministra Asuntu ASEAN, Milena Rangel no Embaixadór UE iha Timor-Leste.
Objetivu Semináriu ne’e atu apoiu ba Integrasaun no Komérsiu Rejionál iha Timor-Leste, ne’ebé implementa husi Sentru Komérsiu Internasionál (ITC-sigla inglés), Uniaun Europeia apoia hela ekipa tékniku nasionál halo hela ezbosu dokumentu tékniku sira ba negosiasaun ho ASEAN kona-ba bens no Servisu sira.
Adezaun Timor-Leste nian ba ASEAN depende, entre rekizitu sira seluk, ba finalizasaun negosiasaun bilaterál ho Estadu Membru ASEAN hotu-hotu kona-ba bens, servisu, no Investimentu, ne’ebé kondisionál atu adere ba Akordu Ekonómiku prinsipál sira ASEAN nian, nomeadamente Komérsiu ASEAN nian iha akordu ba bens (ATIGA), Akordu Komérsiu iha serbisu ASEAN (ATISA/AFAS) no Akordu Investimentu Komprensivu ASEAN (ACIA).
Nune’e, péritu sira ITC nian fó daudaun asisténsia, bazeia ba pedidu sira hosi ekipa nasionál, ba preparasaun dokumentu sira no seminariu ne’e sei foka ba oferta Timor-Leste nian ne’ebé relasiona ho komérsiu nia serbisu sira (ATISA/AFAS).
Iha eventu ne’e, Vise-Ministra Milena Rangel hateten, seminariu ne’e esensiál atu trasa oferta téknika ne’ebé di’ak liu hodi maximiza benefísiu husi adezaun ba ASEAN.
“MNEK maka koordena prosesu maibé serbisu loloos maka iha ministériu no ajénsia xave ida-idak” Milena tenik iha semináriu ne’e.
Governante ne’e dehan tan, “Hamutuk ita forte liu no tanba ne’e maka ita-nia adezaun kompletu sai membru ba ASEAN ne’e esensiál. Nu’udar parte husi ASEAN, ita sei iha pozisaun di’ak liu atu dezenvolve ita-nia ekonomia no atu hadi’a ita-nia Povu nia moris. Ita sei sai apropriadu liu atu proteje ita-nia interese sira no atu kontribui ba pás no estabilidade”.
Alende ne’e, Embaixadór UE iha Timor-Leste,Marc Fiedrich, afirma katak Uniaun Europeia iha kompromisu atu apoia esforsu integrasaun rejionál Timor-Leste nian.
“Jeografikamente, istórikamente, kulturalmente no polítikamente Timor-Leste halo parte iha Sudeste Aziátiku – to’o ona tempu atu halo lasu sira ne’e sai formál. Maibé benefísiu sai membru sei la mai automatikamente, presiza estratéjia di’ak, investimentu no serbisu maka’as,” Embaixadór ne’e konklui.
Jornalista: Hortencio Sanchez
Editór: Florencio Miranda Ximenes
