DILI, 04 jullu 2024 (TATOLI) – Ministru Komérsiu Indústria (MCI), Filipus Nino Pereira, hetan konsumu ai-han ne’ebé kontamina ho frasku iha ámbitu semináriu vizualizasaun internu kona-ba oportunidade no dezafiu governasaun integrasaun globál no rejionál iha sentru komersiál Timor-Plaza.
“Ai-han ne’ebé Ministru Komérsiu no Indústria, Filipus Nino pereira konsumu ne’e, prepara hosi traballadór sira Timor Plaza ba workshop refere, maibé realidade snack ohin,, ministru konsumu ne’e hetan frasku iha laran. Ita ko’alia kona-ba diretu konsumidór, bainhira empreza ida nia prepara ai-han atu oferese ba konsumidór sira tenke prepara ho kondisaun ne’ebé di’ak. Entaun kondisaun ne’ebe mak ohin sira prepra ladi’ak no akontese duni ministru han depois hetan frasku iha laran”, Diretora Nasionál Regulasaun Komérsiu no Protesaun Konsumidór ( DNRKPK) Manuela Silva Tilman, dehan ba jornalista sira iha Timor Plaza, ohin.
Manuela esplika, frasku ida-ne’e tama ona ba ministru nia nanal depois haree ran sai kedas, tafui mai no realidade hatudu duni ran mós sai kedan.
“Entaun ida-ne’e, ita persiza kontatu autoridade relevante sira hanesan PNTL no mós AIFAESA. Tanba ne’e tama ona iha krime, bainhira seidauk konsumu mak hetan, ita bele kontatu ba AIFAESA mesak, maibé ida-ne’e produtu konsumu ona, entaun parte regulasaun komersiál tenke kontatu ho parte rua, oinsá atu haree no rezolve.
Nia relata, AIFAESA hamutuk PNTL ho parte regulasaun komersiál atu haree medida saida mak atu foti.
“Ita tenke haree tanba ne’e krime, ne’e laos ema kualker mak han, se ema kualker mós ami tenke defende tanba ne’e ema nia direitu, satán ema ne’e membru Governu ida mak konsumu hahan ne’ebé iha frasku, entaun ida-ne’e labele akontese, tanba sira bele halo negósiu, sira bele prepara buat hotu, maibé sira tenke respeita ba konsumidór sira-nia direitu”, nia konklui.
Jornalista : Felicidade Ximenes
Editór : Zezito Silva
