DILI, 04 jullu 2024 (TATOLI)–Jerente empreza PT Eureka Gagas Utama husi Indonézia, Daniel Silalahi, hateten reabilitasaun igreja Motael ba preparasaun simu Papa Francisco hala’o vizita pastorál iha Timor-Leste ne’e la’o hela.
Notísia Relevante: Preparasaun simu Papa Francisco: Empreza Eureka Gagas Utama reabilita igreja Motael
“Projetu reabilitasaun igreja Motael ne’e atinje ona 65%,” nia hateten ba Agência Tatoli, iha Motael, kuarta ne’e.
Servisu reabilitasaun ne’ebé la’o ne’e mak hanesan pinta parede igreja iha li’ur ne’e ramata ona, moru husi laran hotu to’o ona 60% no totál pavimentu hanesan nahe fatuk no vazu kuda ai-funan atinje ona 85%.
Reabilitasaun fatin selebrasaun misa iha li’ur hanesan altar atinje ona 75% no halo lutu ba estatua Santu António nian ne’e atinje ona 50% no palku ba atividade kultu parokia nian ne’e atinje ona 30% tanba konstrusaun foun.
Konstrusaun gruta Nossa señora rua ne’ebé iha li’ur ne’e mós atinje ona 45% no agora obra ne’e la’o daudaun no empreza mós harii palku ida ho medida 9X2,5 iha interiór igreja nian.
Iha servisu reabilitasaun sira hanesan pinta moru li’ur, eskritóriu parokiál no moru sorin igreja nian sei kontinua no sei pinta mós igreja laran, bainhira serbisu reabilitasaun altar li’ur ne’e konklui.
Husu konaba bainhira mak reabilitasaun igreja nian ne’e hotu, mandor ne’e hateten sei termina iha inisiu Agustu.
Empreza sei halo esforsu másimu hodi bele termina obra reabilitasaun iha inísiu fulan-agostu.
“Ita bele halo esforsu, bainhira presiza ita bele servisu estra ka adisionál. Maibé, ita halo esforsu atu bele konklui obra la’o tuir alvu,” nia dehan.
Jornalista : Jesuína Xavier
Editór : Cancio Ximenes
