DILI, 03 jullu 2024 (TATOLI) – Sekretaria Estadu Formasaun Profisionál Empregu (SEFOPE) hahú halo koresaun matéria teste eskrita ba kandidatu 42.464, vaga online Austrália nian, durante semana ida.
“Ohin ita halibur malu fila fali iha fatin ida-ne’e hodi realiza atividade koresaun ba matéria ezame iha lian inglés ne’ebé durante ita-nia kandidatu sira aplika ba vaga online Austrália hamutuk 42.464”, Sekretáriu Estadu SEFOPE, Rogério Araujo Mendonça, hateten bainhira halo abertura ba koresaun matéria teste eskrita ba vaga online iha Garden Beach, Pantai Kelapa, ohin.
Governante ne’e apresia ba servisu Diresaun Nasionál Empregu ho Pacific Labour Fasility (PLF) ne’ebé mak esforsu aan tebes ho númeru kandidatu ne’ebé mak boot, entaun ohin loron, hahú tama fila fali ba faze koresaun. aproveita apresia ba Governnu Austrália liuhosi apoiu Pacific Labour Facility ba atividade ida-ne’e to’o semana ida.
“Ohin ita tama ba faze koresaun, entaun ita hatene katak iha Oitavu Governu Konstituisionál husik kandidatu rihun 55 iha sistema, entaun tranzisaun Governu ida ba Governu seluk hanesan kontinua servisu de’it, entaun buka mekanizmu oinsá hodi hola parte kandidatu sira ne’ebé mak iha sistema laran, entaun atu hetan oportunidade ne’ebé mak di’ak mak parte instituisaun Estadu hamutuk ho instituisaun relevante sira nafatin kontrolu ita-nia planu Governu nian, tenke la’o ho transparánsia”, nia epslika.
Nia apela ba diretór-jerál, diretór-nasionál sira no kargu xefia sira katak koresaun ida-ne’e ho responsabilidade no transparánsia, tanba kandidatu sira hein rezultadu ida-ne’e.
“Tanba ne’e husu ba koretór sira atu kontrola ida-ne’e ho kualidade, nune’e publika rezultadu kandidatu hotu bele simu, maske iha ida rua mak sei la simu, maibé ida-ne’e normál no tenke hatudu iha públiku katak ita gasta ona orsamentu Estadu, ita realiza ona iha munisípiu barak, entaun ninia kualidade mós tenke tuir duni ho osan ne’ebé mak ita hasai”, nia relata.
Iha fatin hanesan, Reprezentante Embaixadora Austrália iha Timor-Leste, Penny Roberts, informa iha prosesu teste ba kandidatura sira ne’e, SEFOPE hala’o iha Oecusse, entaun ho esforsu sira ne’e, to’o ohin loron, bele halo koresaun.
“Ita halo abertura ida-ne’e, halo sakrifísiu no esforsu boot ida hosi Dili-Oe-Cusse, hahú teste ho prosesu ne’ebé mak naruk no ema ne’ebé mak barak, entaun ho esforsu sira ne’ebé mak ita iha, ohin loron bele realiza koresaun ida-ne’e”. Penny Roberts dehan.
Governu Austrália agradese ba SEFOPE atu nafatin mantein transparánsia no kredibilidade atu envolve instituisaun relevante sira hodi asegura kualidade sira ne’ebé iha.
Diretor Jerál CAC, Rosario Salsinha Araujo, dehan prosesu ida-ne’e ho integridade tebes tanba hili 80 atu repezenta instuisaun SEFOPE atu halo koresaun ezame ba joven lubuk ida tuir ona vaga online iha fulan rua ba kotuk iha idaidak nia munisípiu.
“Na’in 80 ne’e ami hatene katak nakonu ho integridade ita-nia sekretario estadu ne’ebé mak iha kbiit tomak ba asuntu ida-ne’e, hili na’in 80 la fó dúvida ba públiku, tanba ita boot sira hetan fiar hosi nasaun atu reperezenta instuisaun SEFOPE halo di’ak ba Estadu no halo koresaun ho lolos”, Rosario Salsinha Araujo hateten.
Nia subliña, se karik kredibilidade ne’e mak monu, ita boot sira mak halo servisu lalos, maibé fiar katak ita boot sira halo ida-ne’e tuir matadalan ne’ebé mak iha, tanba ne’e iha semana ida nia laran prosesu sira sei la’o ho di’ak to’o finalidade. CAC nafatin akompaña prosesu sira ne’e tanba hahú kedas hosi munisípiu laiha indísiu hodi hatudu ba SE FOPE katak halo sala ruma, entaun defende nafatin ida ne’e atu lao ba oin ho di’ak.
Provedoria Direitu Umanu no Justisa (PDHJ), Komisaun Anti-Korupsaun (CAC) no Inspetór Jerál Estadu (IGE) sai observadór ba koresaun matéria teste eskrita ba vaga online Austrália.
Jornalista : Felicidade Ximenes
Editór : Zezito Silva
