iklan

NASIONÁL, EKONOMIA, INTERNASIONÁL, DILI, HEADLINE, POLÍTIKA

Diplomata juniór na’in-25 iha MNEK konklui formasaun ekonomia azúl

Diplomata juniór na’in-25 iha MNEK konklui formasaun ekonomia azúl

Imajen/Espesial

DILI, 05 jullu 2024 (TATOLI) – Durante loron lima hahú 01-05 jullu diplomata junior hamutuk na’in 25 tuir formasun iha Ministeriu Negósiu Estranjeiru no Kooperasaun (MNEK) kona-ba ekonómia azúl no termina ona formasaun.

Diretora Jerál Asuntu ASEAN MNEK, Elisa Maria da Silva, hateten, formasaun ne’e formadór mai husi Indonézia no formasaun ne’e hanesan faze dala-rua tanna iha faze primeiru ba diplomata senior sira no ida ne’e ba diplomata juniór sira.

“Formasaun ekonómia azúl ne’e MNEK mak halo kordena ho formadór mai husi Indonézia atu fahe esperiensia kona-ba ekonomia azúl ne’e rasik oinsa mak haree ita nia rikusoi sira iha tasi laran, ida ne’e hanesan faze segundu no ita sei kontinua nafatin ba oin,” Diretora ne’e katak ba Agência TATOLI iha edifisiu MNEK Dili, sesta ne’e.

Nia dehan, materia importante ne’ebé formandu sira hetan durante formasaun mak, hanesan diplomata oinsa tenke hatene hakerek no peskiza kona-ba ekonomia azúl liuliu iha Timor-Leste.

“Ida ne’e miu ida ne’ebé di’ak ba ita nia diplomata sira oinsa mak iha koinesimentu klean kona-ba ekonomia azúl, oinsa sira bele iha koinesimentu kona-ba ita nia rikusoin sira iha ita nia tasi laran. Sira ne’e mesak funsionariu husi MNEK de’it,” nia konklui.

Tuir nia, formasaun ne’ebé MNEK organiza hanesan parte ida mós ba preparasaun Timor-Leste nia adezaun ba ASEAN ne’ebé ko’alia iha kriteria ikus kona-ba pilar ekonomia.

Iha fatin hanesan formadóra husi Indonézia Dinna Prapto Raharja hateten, formasaun ne’e hanesan meiu ida atu fó koinesimentu ba diplomata sira kona-ba ekonomia azúl.

“Formasaun ida ne’e importante tebes atu fó koinesimentu ba diplomata sira oinsa atu hatene kona-ba oinsa bele halo peskiza no hakareke kona-ba ekonomia azúl no identifika riku-soin sira iha tasi lara,” Dinna tenik.

Dinna hatutan, formasaun ne’e atu tulun diplomata sira halo diskusaun iha nivél internasionál tanba kada nasaun tenke hatene klean kona-ba nia riku-soin sira iha tasi laran.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!