DILI, 05 Jullu 2024 (TATOLI) – Projetu alargamentu estrada husi Raikotu to’o rotunda Nicolau Lobato husi empreza Montana Diak daudaun ne’e atinje ona 70%, informa Ministru Obra Públika, Samuel Marçal.
“Kona-ba progresu serbisu alargamentu estrada husi Raikotu to’o rotunda Nicolau Lobato, daudaun ita-nia kompañia halo esforsu maka’as. Hela de’it 30% atu konklui. Tuir planu, Agostu fulan oin tenke ramata ona”, Samuel Marçal dehan ba Tatoli, iha Ministériu Finansa, ohin.
Governante ne’e esplika katak obra ne’ebé falta 30% ne’e tanba estrada sorin seidauk nahe aspál, maibé semana oin empreza sei nahe hotu aspál no hadi’a trotoár ka dalan ninin. “Ita garante antes Papa nia vizita, estrada ne’e finaliza ona”, nia espera.
Samuel Marçal relembra katak estrada ne’e tuir loloos halo ona konstrusaun iha tinan hirak liubá, maibe tanba kestaun indemnizasaun ba abitante sira, inklui Eskola São Miguel maka serbisu ne’e foin mak hahú fali.
Governu liuhusi MOP halo ona indemnizasaun ba komunidade afetada, inklui parte eskola ho montante millaun $1-resin.
Estrada ne’e ho naruk kilómetru 1,2 no ho ninia kustu ba obra ne’e rasik hamutuk millaun $4,2.
Notísia relevante: Serbisu alargamentu estrada Raikotu to’o rotunda atinje 34%
Jornalista: Arminda Fonseca
Editora: Maria Auxiliadora
