DILI, 05 jullu 2024 (TATOLI)–Forum Organizasaun Naun Governamental Timor-Leste (FONGTIL) ho membru nia sira organiza semináriu ho tema “Reforsa kna’ar sosiedade sivíl iha dezenvolvimentu nasionál” hodi defini didi’ak papel sosiedade sivíl ba iha advokasia polítika alokasaun Orsamentu Jerál Estadu (OJE), aprovasaun no nia ezekusaun.
Diretór Ezekutivu FONGTIL, Valentim da Costa Pinto, iha semináriu ne’e sekretáriu FONGTIL ho membru sira organiza hodi ko’alia kona-ba oinsá haforsa papél no kna’ar sosiedade sivil ba lala’ok dezenvolvimentu nasionál ninian.
Sosiedade sivil presiza konpreende konseitu saida mak organizasaun sosiedade sivil haknar hodi iha balansu ida ne’ebé atu hare ba polítika ukun na’in sira.
“ONG nia kna’ar mak hanesan fasilita lala’ok sira iha terrenu no fó formasaun ka empoderamentu ba entidade sira, hanesan edukasaun sivika atu promove boa-governasaun iha servisu públiku no servisu parseria ho entidade hotuhotu ne’ebé di’ak. Halo servisu advokasia hodi bele hetan espasu ka konsiderasaun iha prosesu dezenvolvimentu polítika públika ka intervensaun tékniku sira-ne’ebé presiza halo iha ministériu hotu-hotu, bainhira hahu diskute Orsamentu Jerál Estadu aprovasaun no ezekusaun,” Diretór Ezekutivu FONGTIL, Valentim da Costa Pinto, ba jornalista sira iha Salaun Komisaun Nasionál Eleisaun (CNR, sigla protugés), iha Colmera.
Diretór ezekutivu ne’e hateten, FONGTIL ho membru sira halo advokasia ba iha setór saúde, edukasaun, agrikultura ne’ebé define nia lala’ok sira hodi ba hato’o ba ministériu relevante sira hodi bele tau iha konsiderasaun.
“Ne’e parte kna’ar advokasia ne’ebé ami halo mak iha polítika intervensaun Orsamentu Jerál Estadu (OJE), karik bele aloka orsamentu adekuadu ba setór sira-ne’ebé ami konsidera báziku loos hanesan agrikultura, saúde no edukasaun, Setór sira-ne’e, ami konsidera importante entaun presiza hetan alokasaun orsamentu di’ak atu fasilita ita-nia dezenvolvimentu,” nia dehan.
Nia hateten, movimentu merkadu sira presiza fasilita infraestrutura di’ak no ba servisu públiku sira, tanba bu’at sira-ne’e la’ós buat foun ona mak hanesan iha setor saúde ai-moruk laiha, nune’e kontinua halo advokasia ba ministériu relevante sira atu bele hetan apresiasaun.
Iha fatin hanesan, Adjunta koordenadór Gabiente Sosiedade Sivil, Jacinta Luizinha, garante Governu Konstitusionál da-sia (IX) reforsa servisu hamutuk ho sosiedade sivil sira liuhosi intervensaun ne’ebé fó liuliu apoiu fundu ne’ebé aloka ba.
Orsamentu ne’ebé aloka ba ne’e, ba iha atividade haat mak hanesan promove boa-governasaun, edukasaun sivika, enpoderamentu komunitaria no reforsan instituisaun sosiedade sivil.
“Papel sosiedade sivil importante tebes atu hatuur prosesu dezenvolvimentu nasionál. Entaun, forum ohin, oinsa atu hasa’e koñesimentu sosiedade sivil no organizasaun naun Governamentál sira hodi bele asesu ba iha fundu iha Gabinete sosiedade sivil,” nia dehan.
Jornalista : Jesuína Xavier
Editór : Cancio Ximenes
