DILI, 05 jullu 2024 (TATOLI) – Governu Korea Súl liu husi nia Embaixada iha Timor-Leste apoiu materiál eletróniku ba Ministériu Negósiu Estranjeiru no Kooperasaun (MNEK) hanesan meiu ida hodi apoiu serbisu hotu ba preparasaun Timor-Leste nia adezaun ba ASEAN.“Kontribuisaun ne’ebé Korea fó la’ós foin primeiru, maibé Timor-Leste restaura nia independénsia iha 2002 Korea fó apoia kedan MNEK, materiál ne’ebé ohin sira fó mai ita mak hanesan, destop hamutuk 170, Laptop hamutuk 60, printer hamutuk 60 no projetór 12, ida ne’e mak Korea fó mai MNEK,” Diretór Jerál Bilaterál ba Azia no Oseanu, Marcos dos Reis da Costa, hateten ba jornalista sira iha edifisiu MNEK Dili, sesta ne’e.
Nia dehan, materiál hirak ne’e atu fasilita serbisu kada loron MNEK nian liuliu ezekusaun polítika esterna no serbisu adezaun Timor-Leste nian atu tama ba ASEAN.Tanba ne’e lori superiór hotu iha MNEK hato’o agradese ba Korea ne’ebé laran luak hodi tulun Timor-Leste iha área oioin no serbisu MNEK nian hotu.
Iha okaziaun ne’e,Embaixadór Korea iha Timor-Leste, Shin Man-taek, hateten, Governu Korea esforsu maka’as hodi apoia Timor-Leste nia adezaun ba ASEAN, ho nune’e mak Korea fó apoiu materiál hirak ne’e hodi apoiu serbisu hotu ne’ebé MNEK halo.
“Governu Korea apoiu maka’as Timor-Leste, oinsa prosesu hotu Timor-Leste nian atu adere ba ASEAN. Esforsu saida mak ami bele, ami prontu apoiu Timor-Leste, material hirak ne’ebé ami apoiu dadaun ne’e importante tebes,” Embaxadór ne’e tenik.
Shin Man-taek dehan tan, ” Korea prontu apoiu iha área saida de’it ASEAN presiza Timor-Leste tenke halo, hanesan infrastrutura, ekonomia, tuizmu no seluk tan ami prontu atu apoiu”.
Tuir nia, apoiu ne’e la’ós ikus ba Korea maibé sei kontinua apoiu nafatin Timor-Leste hodi dezenvolve área importante ne’ebé Timor-Leste presiza.
“Ami sei kontinua apoiu nafatin Timor-Leste, materiál sira ohin ne’e importante ba MNEK atu halo serbisu sira ne’ebé ASEAN presiza. Ami sei kontinua apoiu nafatin ida ohin ne’e la’ós ikus maibé sei nafatin ba oin iha área saida de’it,” nia konklui.
Jornalista: Hortencio Sanchez
Editór: Florencio Miranda Ximenes
