iklan

HEADLINE, SEGURANSA

Motorista mikrolete no taksi tenke obedese ba regra hodi uza uniforme

Motorista mikrolete no taksi tenke obedese ba regra hodi uza uniforme

Xefe Departamentu Tránzitu no Seguransa Rodoviária Nasionál, Superintendente Asistente Luís da Costa. Imajan Tatoli/Natalino Costa.

DILI, 05 Jullu 2024 (TATOLI) – Polísia Tránzitu no Seguransa Rodoviária husu ba motorista taksi no mikrolete atu obedese ba regra tránzitu no Lei Kódigu Estrada, tanba dalabarak hamosu infrasaun iha estrada públiku no la uza farda durante hala’o knaar.

“Ami horisehik no ohin halo auto stop hodi kontrola de’it motorista sira ne’ebé malandru, nunka hakarak uza farda bainhira lori mikrolete no taksi. Iha loron rua ne’e ami apreende mikrolete kuaze 40-resin ne’ebé la uza farda, inklui uza kalsa nakles hodi halai karreta buka osan”, Komandante Tránzitu no Seguransa Rodoviária Nasionál, Luís da Costa, dehan iha Kuartél Jerál PNTL Caicoli.

Nia dehan motorista sira ne’ebé la uza uniforme ne’e parte Diresaun Nasionál Transporte Terrestre (DNTT) deside ona hodi prega koima ba sira atu bá selu iha banku. Ho ida ne’e bele hanorin sira katak bainhira uza transporte públiku hodi tula pasajeiru sira tenke respeita ema ne’ebé iha karreta laran.

“Ne’e duni, presiza uza farda no hatais kalsa ne’ebé di’ak, uza sapatu, fuuk tenke sui kabeer, nune’e bele atrai ema seluk utiliza karreta ne’ebé kondutór sira lori”, superintendente ne’e salienta.

Tanba ne’e, serbisu Polísia Tránzitu nian kontinua halo kontrolu hodi redús númeru motorista ne’ebé la kumpre regra ne’e labele lori transporte públiku.

Komandante Luís da Costa mós apela ba patraun sira atu iha liña komunikasaun ho motorista sira, bainhira iha dadeer sira foti karreta atu bá buka pasajeiru tenke kontrola sira uza farda ka la’e, uza kalsa di’ak, no sira-nia dokumentu sei moris ka mate ona.

“Ita kontinua apela ba patraun sira tanba sira maka besik liu ho kondutór sira hodi husu sira labele sai malandru, bainhira lori karreta iha estrada sira”, dehan.

Jaime de Carvalho, na’in ba mikrolete 05 dehan nia sempre halo komunikasaun ho nia motorista, nune’e sira bele iha responsabilidade bainhira lori karreta iha dalan públiku.

“Ha’u sempre hateten ba sira, karreta imi lori ne’e kuandu iha uma maka ha’u-nia, maibé iha ona estrada públiku ne’e imi-nia”, nia haktuir.

Ba patraun ne’e, importante liu motorista tenke hatene regra no lei sira kona-ba kódigu estrada nian, depois tenke iha kondisaun ne’ebé di’ak no respeita ema seluk, liuliu tenke hatais mós nune’e bele atrai ema seluk hakarak sa’e karreta ne’ebé sira lori.

Nia realsa katak ho pasa-revista ne’ebé Polísia Tránzitu halo, nia motorista mós tama iha risku, tanba la uza farda, nune’e nia sei kompleta tiha prosesu administrasaun iha banku.

Notísia relevante: Polísia Tránzitu kontribui $21.576 ba kofre

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!