SEKoop destaka funsionáriu na’in-11 hodi kapasita kooperativa iha Viqueque
VIQUEQUE, 05 jullu 2024 (TATOLI)- Sekretáriu Estadu Kooperativa (SEKoop), destaka ona funsionáriu na’in-11 hodi apoia kapasitasaun no akompaña kooperativa sira-ne’ebé eziste iha munisípiu Viqueque.
Destaka funisionáriu ne’e, SEKoop Arsénio Pereira da Silva, entrega diretamenta ba Prezidente Autoridade Munisípiu (PAM), Viqueque, Francisco Cruz Simões de Gonzaga Soares.
Hafoin ramata entrega, SEKoop, Arsénio Pereira da Silva, husu PAM atu envolve mós funsionáriu SEKoop hodi bele partisipa atividade sira-ne’ebé hala’o iha munisípiu Viqueque liuliu ba serimónia hasa’e bandeira, limpeza no seluk tán. Atu nune’e funsionáriu sira-ne’e bele ajuda munisípiu Viqueque. Aleinde ida-ne’e funsionáriu sira mós sei fó apoiu liuliu kapasitasaun no akompaña ba kooperativa sira-nia ezisténsia.
“Ohin ami entrega funsionáriu sira-ne’e ba autoridade munisípiu Viqueque hodi apoia servisu no apoiu ba kooperativa sira-ne’ebé eziste iha munisípiu Viqueque”, SEKoop afirma ba jornalista sira, iha resintu administrasaun Viqueque, ohin.
Governante ne’e husu apoia ba PAM Viqueque hodi apoia espasu ka fatin foun ruma hodi SEKoop hari’i edifísiu ba servisu kooperativa iha Viqueque.
Iha fatin hanesan, PAM Viqueque, Francisco Cruz Simões de Gonzaga Soares, husu agradese ba SEKoop ne’ebé destaka ona funsionáriu mai munisípiu Viqueque, atu ba oin bele apoiu kooperativa sira-ne’ebé daudaun eziste iha Viqueque.
“Ida-ne’e sai mós oportunidade di’ak ba kooperativa sira hodi fasilita ita-nia grupu kooperativa. Nunee’e ami prontu hodi haree espasu balun ba SEKoop tanba SEKoop nia-ezisténsia importante tebes ba vida komunidade agrikultura sira iha munisípiu Viqueque”. Tenik nia.
Funsionáriu SEKoop ne’ebé destaka iha munisípiu Viqueque na’in-11 kompostu husi mane 6 no feto na’in-5, husi funsionáriu sira-ne’e sei koloka ba postu administrativu lima.
Tuir dadús kooperativa sira-ne’ebé eziste iha munisípiu Viqueque totál hamutuk 17 no hetan ona rekoñesementu husi SEKoop, husi númeru ne’e kooperativa multi setorál rua no Kooperativa Uniaun Kréditu hamutuk 15.
Notisia relevante:
Jornalista : Vitorino Lopes da Costa
Editór : Florêncio Miranda Ximenes
