DILI, 06 jullu 2024 (TATOLI)—Primeiru-Minsitru, Kay Rala Xanana Gusmão, sábadu ne’e, halo lansamentu livru habelar Sorghum iha Timor-Leste iha sede Movimentu Brigada Fini Kay Rala Unidade Asaun Progressu (MBFK-UAP) Fatubanco, Tasi-Tolu, Dili.
“Lansamentu livru ida-ne’e atu fanu ita nafatin habelar fini sorghum ba ita-nia komunidade sira tanba atividade ne’e inspira ona povu Timor-Leste reflete konvivénsia toos-na’in sira luta ba sosioekonomia iha ita-nia rain,” Primeiru-Ministru Kay Rala Xanana Gusmão, hateten iha ninia intervensaun iha sede MBX-UAP Tasi-Tolu.
Governu nafatin ko’alia kona-ba oinsá atu ajuda kooperativa sira, nune’e saida mak imi prodús ne’e bele fó rendimentu ba imi hotu.
“Ida-ne’e produsaun ida-ne’ebé mak ita hakarak aumenta nafatin hodi hadi’a mós saúde husi labarik sira-nian to’o boot, tanba ne’e presiza prodús ai-han mak tenke simu benifisiu husi ita-nia esforsu sira. Tanba, ita hotu hatene katak sorghum bele halo ba masin-midar, ai-farina no seluk tan, atu nune’e ba oin sei utiliza ba merenda eskolár, hodi labarik sira bele konsumu. Tanba ne’e, ami nafatin tau Sorgha Sorghum ida-ne’e no tau nia orsamentu nafatin, nune’e ba toos-na’in sira iha baze bele nafatin habelar fini ida-ne’e ba futuru,” nia hateten.
Diretora Ezekutiva Sorgha Sorhum, Angela de Araujo, hateten MBX-UAP Tasi-Tolu durante ne’e hala’o servisu voluntáriu hahú iha loron 13 jullu 2021 hamutuk ho atuál Primeiru-Ministru Kay Rala Xanana Gusmao ba Sorgha Sorghum ida-ne’e.
“Ami habelar ona fini sorghum husi kilu ida, tanba fini ida-ne’e simu direta husi Diana Widiastuti no rekomenda rasik husi atuál PM nu’udar konsilleiru ba MBX-UAP. Entaun, programa ida-ne’e inspira ona ami povu atu reflete konvivénsia toos-na’in luta ba sosioekonomia iha ita-nia rain liu-liu ba iha munisípiu 11 hanesan Ainaro, Baucau, Bobonaro, Covalima, Dili, Ermera, Lautem, Liquiça, Manatuto, Manufahi,Viqueque no RAEOA,” nia dehan.
Koordenadór Sorgha Sorghum MBX iha RAEOA, Lamberto Fuanami, husu ba Governu atu fó apoiu ekipamentu sira, nune’e bele halo programa Sorgha Sorghum ida-ne’e la’o ho di’ak iha futuru.
“Ami iha terrenu hasoru difikuldade liu-liu ba ekipamentu sira-ne’ebé toos-na’in sira utiliza, entaun husu ba Governu bele apoiu ida-ne’e,” Lamberto Fuanami hateten.
Maske ho difikuldade ne’ebé mak iha, maibé nafatin iha inisiativa hodi tuur hamutuk ho toos-na’in sira iha baze hodi fó hanoin ba sira katak servisu nafatin tuir kbiit ne’ebé mak iha, tanba drante tinan naruk ona la hetan apoiu hosi parte seluk, maibé lao tuir de’it saida mak to’os-naín sira iha.
“Ohin loron, ami bele atinje ona sorgha sorghum balun iha RAEOA. Tan ne’e, ha’u husu ba Governu nafatin tau matan ba atividade ida-ne’e liu-liu ba to’os-na’in sira-ne’ebé mak iha baze,”
nia dehan.
Entretantu, atividade sorgha Sorghum ne’e munisípiu lima mak kolleta ona mak hanesan Baucau, RAEOA, Bobonaro, Dili no Viqueque hamutuk tonelada 2.2846 no munisípiu sira seluk sei prosesu kuda.
Jornalista : Felicidade Ximenes
Editór : Cancio Ximenes
