TL-Moçambique asina akordu tolu inklui mina no gás
DILI, 06 jullu 2024 (TATOLI)—Governu Timor-Leste liuhusi Ministru Negósiu Estranjeiru no Kooperasaun (MNEK), Bendito Freitas, selebra ona akordu kooperasaun iha área importante tolu inklui esplorasaun mina no gás.
Akordu ne’e asina ho Ministra Negósiu Estranjeiru no Kooperasaun Mozambique, Verônia Mocamo, hafoin ramata enkontru bilateral entre Prezidente Repúblika Timor-Leste, José Ramos Horta ho delegasaun ho Xefe Estadu Moçambique, Filipe Jacinto Nyusi, iha Palásiu Prezidensiál, iha ámbitu vizita ofisiál Prezidente Repúblika, José Ramos Horta nian.
“Memorandu entendimentu tolu ne’e, primeiru kona-ba estabelesimentu mekanizmu permanente ba konsulta polítika diplomátika no ida-ne’e téknikamente atu bele halo diskusaun. Ida tan mak ba ensinu superiór, siénsia no teknólojia nian. Ida fali mak ba esplorasaun mina no hidrokarbonetus,” Ministru Bendito hateten liuhusu nota ne’ebé Agência TATOLI asesu, sábadu ne’e.
Iha nota ne’e, nia dehan, Prezidente Repúblika Moçambique mós husu Timor-Leste atu fahe esperiénsia ba sira kona-ba jestaun fundu soberanu ka fundu petrolíferu.
“Sira husi Moçambique mós husu atu bele haree esperiénsia ita-nian kona-ba jestaun fundu soberanu. Ita kona-ba indústria estrativa ne’e avasandu ona, tanba ne’e mak sira hein husi ita atu aprende ba setór ida-ne’e. Espera katak, ekipa téknika bele mai para aserta,” Xefe Diplomasia Timor-Leste ne’e hateten.
Asuntu seluk ne’ebé ko’alia mós mak iha área edukasaun, saúde, agrikultura, dezenvolvimentu kapitál umanu inklui kooperasaun multilaterál iha nível Nassain Unida no organizmu multilaterál sira seluk ne’ebé Timor-Leste ho Moçambique bele tulun malu.
Prezidente Ramos Horta mós husu Moçambique ne’ebé hanesan nasaun dahaat iha organizasaun Komunidade Ko’alia Lian Portugés (CPLP-sigla portugés) husi Portugal, Brazil no Angola, inklui mós nasaun membru CPLP sira seluk, atu loke Embaixada iha Timor-Leste, nune’e bele konsolida liután relasaun no kooperasaun entre Estadu membru sira.
Jornalista : Hortencio Sanchez
Editór : Cancio Ximenes
