Prezidente Repúblika simu prémiu hosi Moçambique
DILI, 07 jullu 2024 (TATOLI)– Prezidente Repúblika (PR), José Manuel Ramos Horta, simu prémiu Xave Maputo iha Moçambique, kontinenente Áfrika.
Nota imprensa ne’ebé Ajénsia TATOLI, asesu domingu ne’e informa, Prezidente José Ramos-Horta hetan onra ho prémiu prestijiadu “Xave Maputo” hosi Konsellu Munisipál Maputo nian, sidade kapitál Moçambique nian.
Prémiu ne’e rekoñese Ramos-Horta nia realizasaun polítiku no akadémiku sira-ne’ebé signifikativu, nune’e mós nia estatutu nu’udar laureadu Nobel ba Pás nian.
Iha serimónia ne’ebé hala’o iha Asembleia Munisipál, Prezidente Konsellu Munisipál Maputo, Razaque Manhique, aprezenta pesoalmente “Xave Maputo” ba Prezidente Ramos-Horta.
Prémiu ne’e fó tuir rezolusaun ida-ne’ebé aprova hosi Asembleia, ne’ebé rekoñese nia serbisu no realizasaun sira durante nia moris tomak.
Ramos-Horta, oras ne’e hala’o nia mandatu daruak nu’udar Prezidente Timor Leste (uluk kaer kargu ne’e husi tinan 2007 to’o 2012), hetan respeitu barak tanba ninia abilidade diplomátika no serbisu la kole iha rezolusaun konflitu.
Horta hetan prémiu Nobel ba Pás iha tinan 1996 tanba nia esforsu atu hetan solusaun pasífiku ba konflitu iha Timor-Leste nian.
Prémiu Xave Maputo hametin liután ligasaun entre Moçambike no Timor Leste, nasaun rua ne’ebé ko’alia lian portugés ho istória luta ba independénsia no esforsu konstrusaun nasaun nian ne’ebé tuir mai.
Bainhira simu prémiu ne’e, Prezidente Ramos-Horta hato’o nia agradesimentu no reafirma nia kompromisu hodi haburas dame no kooperasaun entre nasaun rua ne’e.
Jornalista: Natalino Costa
Editór: Evaristo Soares Martins
