BAUCAU, 08 jullu 2024 (TATOLI) – Komisaun organizadora ba preparasaun vizita Papa Francisco hosi munisípiu Baucau planeia mobiliza sarani hamutuk rihun 50 atu partisipa misa iha Tasi Tolu, Dili iha fulan setembru.
Vise-komisaun organizadora preparasaun vizita Papa, Padre Manuel da Silva Ximenes, SDB, esplika, komisaun munisípiu Baucau halo tuir orintasaun husi nasionál ligadu ho preparasaun vizita Papa Francisco nune’e husi Baucau prepara sarani hamutuk rihun 50 ne’ebé rejista iha kada suku liuhusi kada postu administrativu ne’ebé kolobora ho parókia sira-ne’ebé eziste iha munisípiu Baucau.
“Hein sei bele hetan rezultadu kona-ba estimasaun totál ema-ne’ebé disponivel atu partisipa iha eventu istóriku ne’e, ha’u hanoin tempu mak limitadu maibé sei kontinua buka maneira atu atinje orientasaun husi nasionál,” Primeiru vise komisaun organizadora hateten iha Vila Nova, segunda ne’e.
Atuál Padre Parókia Santu António ne’e, konsidera, prezensa Papa Francisco mai Timor-Leste nu’udar momentu istóriku tanba vizita referida ba daruak lideransa Vatikanu iha Timor, liuliu relasiona ho selebrasaun ezisténsia prezensa kreda Katólika iha rai lorosa’e ba tinan-500.
Padre Manuel Ximenes, husu kada seksaun iha komisaun organizadora atu esforsu halo preparasaun ho másimu nune’e bele atinje planu husi nasionál katak partisipante ba selebrasaun misa iha Tasi tolu hamutuk rihun 700 tanba númeru referida aas liu vizita bainhira kompara ho prezensa Papa João Paulo II iha tinan-1989 ne’ebé tótal sarani ne’ebé partipa hamutuk rihun 250.
“Nu’udar katóliku, ita fiar katak Papa mai nu’udar vigáriu kristu nian iha mundu no susesór São Pedro,” Padre Manuel Ximenes akresenta.
Tuir planu mobilizasaun sarani husi Baucau ho totál rihun 50 maihusi postu administrativu Baguia hamutuk rihun ualu, Baucau rihun 11, Laga rihun ualu, Quelicai rihun sia, Vemasse rihun neen no Venilale rihun ualu.
Komisaun organizadora preparasaun vizita Papa Francisco husi munisípiu Baucau kria ona ekipa tuir seksaun hanesan halo planu hahaan ba sarani sira hanesan prapara hahaan durante halo peregrinasaun.
Alende ne’e, planu primeiru sukoru ne’ebé envolve husi profisionál saúde hamutuk na’in-32 kompostu husi pesóal Serbisu Munisipál Saúde, Horex, Sames, IP no Cruz Vermelha ho dekrisaun serbisu hanesan halo atendimentu saúde ba sarani ne’ebé presiza kontrola, akompaña sarani sira durante misa no vizita sarani sira iha fatin deskansa.
Komisaun organizadora sei prepara uniforme hanesan kamizola no kartaun asesu durante prosesu movimentasaun ne’ebé sei akompaña husi Komandante Polísia Eskuadra, Padre Parókia, Xefe Sentru Saúde ino Administradór Postu Administrativu sira.
Sarani husi munisípiu Baucau sei konsentra iha Hera no bandu atu iha vizita familia no sei hetan pasa revista husi parte seguransa hafoin ba fatin serimónia iha Tasi Tolu.
Jornalista : Natalino Belo
Editór : Evaristo Soares Martins
