iklan

INTERNASIONÁL, DILI, HEADLINE, POLÍTIKA

Instalasaun enerjétika CTM bele sai referénsia ba Timor-Leste

Instalasaun enerjétika CTM bele sai referénsia ba Timor-Leste

DILI, 08 jullu 2024 (TATOLI)- Ministru Negósiu Estranjeiru no Kooperasaun (MNEK), Bendito dos Santos Freitas hateten, instalasaun Sentrál Termoelétrika Empreza Públika (CTM.e.p-sígla Portugés) Moçambique nian modernu ho kualidade di’ak, nune’e bele sai referénsia ba Timor-Leste.

Ministru Bendito Freitas hato’o assuntu ne’e, hafoin reprezenta Prezidente Repúblika, José Ramos Horta hala’o vizita ba iha instalasaun enerjétika CTM nian iha Maputo, iha okaziaun ofisiál Xefe Estadu nian iha nasaun referidu.

Prezidente delega ha’u ba vizita instalasaun Sentrál Termoelétrika Maputo, instalasaun ida-ne’ebé modernu teb-tebes ba enerjia elétrika bele sai hanesan referénsia ida atu ita-nia ekipa téknika sira bele halo estudu komparativus hodi haree katak, komponente enerjia ne’e, alende ita-nia komponente ekonómiku hanesan agrikultura no mós dezenvolvimentu ekonómiku sira seluk, enerjia ne’e impotante teb-tebes ba dezenvolvimentu povu nia moris,” Ministru Bendito hatete liu husi nota ne’ebé Agência TATOLI asesu husi media MNEK, ohin.

Projetu konstrusaun ba instalasaun enerjétika CTM.e.p ho valor orsamentu hamutuk millaun $167 husi kooperasaun entre Governu Mosambike ho Governu Japaun liu husi JICA, no inaugura iha tinan 2018, iha ne’ebé fornese ona liña eletrisidade iha kapital Maputo no mós parte sul Áfrika Austral nian ho MW 106.

Tanba ne’e, Governante ne’e dehan, ba futuru, Governu Timor-Leste ho Mosambike presiza esplora kooperasaun iha setór enerjia nian, atu bele fasilita di’ak liután ekipa téknika husi Timor hodi vizita ba instalasaun sentru termoelétrika Maputo.

“Iha diskusaun ho Prezidente Konsellu Administrasaun ho ekipa téknika, ita diskute área ida-ne’ebé importante teb-tebes ba TimorLeste bele esplora kooperasaun bilateral, nia tama iha kontestu kuádru kooperasaun CPLP nian, alende mobilidade ba ema nian, ita mós konsidera hanesan sustentabilidade enerjia nian parte ida-ne’ebé bele hamosu kooperasaun entre Timor-Leste ho Mosambike,”  nia tenik.

Entretantu, vizita Ministru Bendito Freitas ba instalasaun Sentral Termoelétrika ne’e, akompañadu husi Diretór-Jerál Bilateral ba Assuntu, Áfrika Europa, Amérika no Médiu Oriente, Francisco Dionísio Fernandes ‘Mau-kura’, Primeira Sekretáriu Embaixada Timor-Leste ba Mosambike, Lenilde Pereira no seluk tan.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!