iklan

INTERNASIONÁL, DILI, HEADLINE, POLÍTIKA

Ramos Horta fó onra ba Moçambique apoia ba Timor-Leste durante luta

Ramos Horta fó onra ba Moçambique apoia ba Timor-Leste durante luta

Prezidente Repúblika, José Ramos Horta.Imajen/Media PR

DILI, 08 jullu 2024 (TATOLI)– Prezidente Repúblika, José Ramos Horta, hato’o diskursu iha bankete Estadu iha Moçambique, hodi fó onra ba Moçambique nia apoiu ba Timor-Leste hodi luta ba independensia.

Durante diskursu, Prezidente Ramos Horta ko’alia liu kona-ba ligasaun istórika, linguistika no kulturál ne’ebé Timor-Leste ho Moçambique fahe.

“Papél krítiku ne’ebé hala’o hosi Moçambique no nasaun afrikanu sira seluk ne’ebé ko’alia lian portugés (PALOP) iha viajen Timor-Leste nian ba autodeterminasaun, ne’ebé kulmina iha ninia independénsia iha loron 20 fulan-Maiu tinan 2002,” Horta tenik iha nota ne’ebé Agência TATOLI asesu husi media Prezidente Repúblika, ohin.

Xefe Estadu elojia eis-Prezidente Moçambique,  Joaquim Chissano tanba nia esforsu no dedikadu hodi kaer Timor-Leste nia kauza iha nivel internasionál.

Iha ámbitu ne’e, Ramos Horta fó-hanoin fali oinsá Moçambique fó hela-fatin ba estudante no diplomata Timor-oan sira durante sira-nia tinan luta nian, no mós haluan pasaporte Moçambique nian hodi fasilita sira-nia servisu viajen no advokasia internasionál.

Haree ba futuru, Prezidente Ramos Horta husu atu habelar kooperasaun entre nasaun rua iha área oioin, inklui edukasaun, diplomasia, no asuntu globál sira hanesan mudansa klimátika no dezenvolvimentu sustentável.

Prezidente mós fó sai estabelesimentu embaixada Moçambique nian ida foin lalais ne’e iha Díli, hodi hametin liután relasaun diplomátika entre nasaun rua ne’e.

Jornalista: Hortencio Sanchez

Editor:       Florencio Miranda Ximenes

iklan
iklan

Leave a Reply

iklan
error: Content is protected !!