iklan

EKONOMIA, HEADLINE

CLN koopera ho SEkoop sosa produtu lokál husi kooperativa sira

CLN koopera ho SEkoop sosa produtu lokál husi kooperativa sira

Sekretáriu Estadu Kooperativa, Arsénio Pereira da Silva, konvoka reuniaun ho Prezidente CLN hamutuk ho nia ekipa téknika sira, iha Akait, tersa (09/07/2024). Imajen Tatoli/Egas Cristóvão

DILI, 09 jullu 2024 (TATOLI)—Sentru Lojístika Nasionál (CLN, sigla portugés) hamutuk ho Sekretaria Estadu Kooperativa (SEKoop), tersa ne’e, realiza enkontru dahuluk hodi halo kooperasaun atu sosa produtu lokál husi setór kooperativa sira.

Sekretáriu Estadu Kooperativa, Arsénio Pereira da Silva, hateten, enkontru hodi halo preparasaun ba oin hodi asina nota entendimentu ida atu CLN bele sosa produ lokál husi kooperativa agríkola sira ne’ebé halo produsaun ba batar, hare no seluk tan.

“Inisiativa ida-ne’e, SEKoop fasilita de’it ba kooperativa sira iha territóriu tomak oinsá mak bele halo produsaun bazeia ba polítika Governu nian, nune’e CLN bele sosa hodi halo intervensaun ba merkadu no bele halo distribuisaun ba merenda eskolár,” Sekretáriu Estadu relata iha ninia knaar fatin, Akait.

Liuhusi enkontru ohin ne’e parte rua fó hanoin ba malu saida mak bele halo, CLN nu’udar sosa na’in no SEKoop nia papél atu mobiliza kooperativa sira halo produsaun agríkola ho kuantidade barak.

“Ida-ne’e mak ami tuur hamutuk fó hanoin ba malu no iha futuru serbisu hamutuk. Ita-nia produtór sira mós bele hetan benefísiu husi programa Governu liuhusi sosa produtu ne’e,” nia dehan.

Notísia relevante : SEKoop-FHM realiza feira hodi promove produtu kooperativa iha rejionál

Parte SEKoop hato’o ona ba Ministériu Koordenadór Asuntu Ekonómiku (MKAE) hodi CLN bele sosa produtu husi kooperativa nune’e benefísiu ne’e nafatin ba timoroan sira.

“Maibé ita mós tenke haree kuantidade hira mak CLN atu sosa tanba iha produtu kooperativa oin-oin. Ba SEKoop commudity ida sai prioridade Bafo Kayrala ne’e, daudaun ami halo ona produsaun tonelada 70-resin iha territóriu tomak no balun prosesa ona sai hanesan merenda eskolár, hahán balada no seluk tan,” nia tenik.

Kooperativa ne’ebé eziste to’o ohin loron hamutuk 222 iha área produsaun neen (rejistadu), ne’ebé husi ne’e sira-nia membru ne’ebé envolve iha kooperativa hamutuk 31.000-resin no akumula kapitál millaun $17.

“Ita nafatin halo sosializasaun ba produtór sira iha área rurál atu oinsá organiza-an iha kooperativa atu sira-nia produtu sira bele folin,” governante ne’e salienta.

Kooperasaun ne’e la’o bazeia ba polítika IX Governu liuhusi SEKoop ba kooperativa agríkola ne’ebé iha importánsia estratéjika ba dezenvolvimentu nasionál.

Harii kooperativa ne’e hanesan forma ida atu enkoraja kresimentu setór privadu iha zona rurál no estimula (ka insentiva) partisipasaun ativa iha sistema ekonómiku nasionál.

Governu sei kontinua investe iha formasaun rekursu umanu no kapasidade institusionál, iha nível kooperativa no providénsia ferramenta no ekipamentu, matéria-prima no konsesaun pekuniária (ka finanseira) ne’ebé permite hadi’a nia infraestrutura no aumenta kualidade husi nia produtu, ho hanoin halo expansaun merkadu no aumentu iha atividades  komérsiu.

Dezenvolve no sosializa ideia ho projetu ne’ebé bele iha, ba família ho komunidade, ne’e hanesan mós forma ida hodi kria kondisaun ba dezenvolvimentu kooperativa no ekonomia família sira.

Buat sira ne’e balun mak hanesan produsaun bani-been, paun, susu-been, produsaun mina nuu, no masin.

Iha área ida-ne’e, Governu sei kontinua presta (ka fó) apoiu no konsesaun públika ba kooperativa, ne’ebé hala’o atividade setór privadu iha área oin-oin mak insentiva movimentu kooperativa, asosiativu no mutualista atubele garante partisipasaun komunitária no ajuda dinámika ne’ebé mosu iha terseiru setór (ka setór datolu), iha luta hasoru dezigualdade sosiál no ekonómika.

Insentiva resposta ne’ebé organizada, husi sosiedade sivíl, ba nesesidade sosiál, liuhusi konsensaun bens no prestasaun de servisu sira, no utilizasaun sosiál ba exedente ne’ebé hetan, fasilita asesu de kréditu ba kooperativa, revee sistema kona-ba asesu ba kréditu ba kooperativa kréditu inklui simplifikasaun iha prosesu ne’e, promove interkámbiu entre kooperativa.

Liuhusi insentiva fornesimentu matériál prima ne’ebé prodús liuhusi kooperativa ba indústria setór ida-idak, no ba distribuisaun ka sosa direta ba konsumidores, insentiva fornesimentu bens alimentár no sira seluk ne’ebé produs husi kooperativa, ba merenda eskolár, koordena ho CNL no setór privadu ba akizisaun produsaun husi kooperativas no seluk tan.

Iha Fatin hanesan Prezidente CLN, António de Araújo Soares, hateten, kooperasaun ne’ebé parte rua halo ne’e, importante tebes, tanba Governu nia programa ida sosa produtu lokál husi produtór sira ne’e, atu fasilita produtór sira bele hasa’e produsaun rai-laran.

“Entaun ne’e ita koopera ho SEkoop oinsá kooperativa sira parte agríkola ninian ne’e, sira-nia produsaun CLN mak sosa tanba Governu liuhusi SEKoop apoiu pensaun insentiva atu fó produtór sira atu hasa’e produsaun.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!