iklan

HEADLINE, SAÚDE

Ekipa konjunta afirma medikamentu sufisiente iha INFPM

Ekipa konjunta afirma medikamentu sufisiente iha INFPM

Komisariu Komisaun Funsaun Públika Agapito da Conceicao lidera ekipa konjunta ne'ebé kompostu husi Komisaun Funsaun Públika, Komisaun Anti Korrupsaun no Inspesaun Jerál Estadu halo vizita supreza ba Institutu Nasionál Farmasia no Produtu Mediksmentu iha tersa (9/7) ohin.Imajen Tatoli/Natalino Costa.

DILI, 09 jullu 2024 (TATOLI) – Ekipa konjunta kompostu hosi Komisaun Funsaun Públika, Komisaun Anti-Korrupasaun, Inspesaun Jerál Estadu no Patrimóniu Estadu, hateten bazeia ba rezultadu inspesaun katak ai-moruk iha Institutu Nasionál Farmásia no Produtu Medikamentu (INFPM) susfisiente atu atende ba pasiente sira.

“Ohin mai ekipa konjunta ida mai halo vizita supreza ida mai Institutu Nasionál Farmásia no Produtu Medikamentu hodi haree liu estoke ai-moruk sira ne’ebé iha ne’e. Depois ami koalia uitoan ho parte aprovizionamentu, sira relata katak ai-moruk ne’ebé mak iha Institutu Nasionál Farmásia no Produtu Medikamentu ne’e sufisiente atu atende ba ita-nia komunidade sira”, Komisáriu Komisaun Funsaun Públika Agapito da Conceição dehan ba jornalista sira hafoin halo inspesaun INFPM, Kampung Alor, tersa ne’e.

Nia dehan, estoke medikamentu ne’ebé iha armajen INFPM bele responde ba nesesidade to’o marsu tinan oin.

“Ami check ona iha lista ne’ebé sira hato’o mai ami katak estoke ai-moruk ne’ebé mak agora daudaun iha ne’e kompletu no sufisiente no sira mós hateten katak sei hatama tán medikamentu balun iha fulan-Jullu ne’e hamutuk 27 pursentu tanba ne’e ita-nia estoke ai-moruk ne’ebé agora dadaun iha, bele responde ba nesesidade to’o dezembru tinan ne’e no bele mós to’o marsu tinan oin”, nia adianta.

Nia dehan, INFPM halo jestaun ba medikamentu sira oinsá haree ba distribuisaun nian.

“Sira atu halo distribuisaun ba medikamentu ida ba óspitál tenke hato’o pedidu mai no sira sei haree óspitál ida ne’ebé rejista liu moras saida, entaun sira sei distribui ai-moruk ida-ne’e para evita estoke no evita ema atu jeneraliza katak óspitál ida ai-moruk laiha”, nia afirma.

Iha fatin hanesan, Diretór Prevensaun Komisaun Anti-Korrupsaun, Rosário Salsinha, hateten estoke ai-moruk sufisente.

“Ai-moruk sira ne’ebé mak iha armajen iha item kompletu no estoke sufisiente no laiha problema. Tanba ne’e ha’u atu hateten katak prekupasaun públiku nian ne’ebé dehan katak ai-moruk laiha ne’e realidade buat la hanesan ida, buat ne’e ohin ami haree iha armajen INFPM estoke ai-moruk sufiente”, nia informa relata .

Nia dehan, dalaruma iha públiku hateten óspitál balun ai-moruk laiha, ida-ne’e tanba sira mak tarde iha prosesu halo pedidu mai INFPM.

“Kestaun sira ne’ebé maka mosu iha ita-nia komunidade dehan ai-moruk laiha, ha’u hanoin realidade mak ohin ami haree ne’e, lahanesan saida mak ema koalia. INFPM hatudu nia kapasidade hodi jere ai-moruk sira no ai-moruk sira ne’e sufisiente no ita bele haree katak estoke ne’e sei bele to’o tinan oin”, nia afirma.

Diretór Ezekutivu INFPM Brigido Simão Dias de Deus, hateten situasaun agora estavel no iha medikamentu naton atu bele responde ba situasaun.

“Ita mós sei kompras ba medidakmentu kuaze 200 item mak sei mai tán, ne’ebé ha’u hateten katak ita nia ai-moruk bele kobre to’o dezembru no bele to’o janeiru tinan oin”, nia konklui.

Aleinde vizita ekipa konjunta ba INFPM, iha mós vizita supreza ida ba Hospital Nasionál Guidu Valadares hodi haree diretamente problema ai-moruk ne’ebé menus iha ospitál. Ai-moruk, atualmente sei iha pursentu 27, balun sei iha dalan atu tama mai, tanba ne’e, sei sufisiente ba pasiente sira.

Notísia relevante : Ai-moruk ho estoke 14% mamuk iha HNGV

Jornalista: Natalino Costa/Dady

Editór : Zezito Silva

iklan
iklan

Leave a Reply

iklan
error: Content is protected !!