iklan

HEADLINE, SAÚDE

Governu diskute PAN multisetorál kombate stunting 2024-2030

Governu diskute PAN multisetorál kombate stunting 2024-2030

Vise-Primeiru-Ministru no Ministru Koordenadór Asuntu Ekonómiku, Francisco Kalbuadi Lay. Hamutuk ho Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, Sorumutuk meza redonda planu aksaun national ba nutrisaun multisektoral hodi kombate stunting iha Timor-Leste 2024-2030. iha Ministériu Finansa, Aitarak-Laran, Dili, tersa (05/07). Imajen Tatoli /Egas Cristovão

DILI, 09 jullu 2024 (TTAOLI) – Governu atuál sorumutu liuhosi meza redonda hodi diskute Planu Asaun Nasionál (PAN) multisetoriál hodi kombate stunting tinan 2024 to’o 2030.

“Ita hamutuk iha ne’e atu buka solusaun no koordena servisu ne’ebé mak importante tebes ba Planu Asaun Nasionál multisetorál, ne’ebé mak durante ne’e lidera hosi Primeiru-Minsitru Kay Rala Xanana Gusmao, maibé ohin fó hela servisu ida-ne’e mai ha’u hanesan Vise Primeiru Minsitru no Ministru Koodenadór asuntu Ekonómiku hamutuk ho Vise Primeiru Ministru Asuntu Sosiál atu hamutuk no kolabora ba servisu ida-ne’e”, Francisco Kalbuadi Lay, informa liuhosi nia diskursu iha Auditorium Kay Rala Xanana Gusmão Ministériu Finansa, ohin.

Tanba ne’e, lori Governu nia naran agradese ba ita boot sira liuliu ba Vise primeiru Minsitru asuntu Sosiál ne’ebé mak lidera dereta ba asuntu ida-ne’e no mós Ministériu Saúde, Ministériu Solidariedade Sosiál no Ministériu Edukasaun ne’ebé reprezenta hosi Sekretáriu Estadu Komunikasaun Sosiál no mós sira seluk ne’ebé mak iha fatin ida-ne’e.

Iha fatin hanesan, Vise Primeiru Ministru no Ministru Koordenadór ba asuntu Sosiál, Mariano Assanami Sabino, informa enkontru ida-ne’e bolu liña ministeriál sira ne’ebé mak servisu hodi kombate stunting ida-ne’e, atu hamutuk iha asuntu ne’e molok lori ba Konsellu Ministru atu halo aprovasaun.

“Ita haree ita-nia rain katak má nutrisaun krónika hamutuk 47% ne’ebé mak afeta ba raes badak no ida fali mak 8.6% ba labarik sira ne’ebé mak krekas, entaun ida-ne’e fó risku ba labarik sira mate, entaun oinsa ita bele haree hamutuk planu nasionál ba kombate má nutrisaun krónika ka kombate stunting ida-ne’e atu lori ba KM atu hetan aprovasaun”, Assanami dehan.

“Primeiru-Ministru delega ha’u hanesan Vise PM no interministeriál hanesan movimentu boot ida ne’ebé mak ita halo ho objetivu prinsipál atu hatún númeru ne’e, bainhira 2030 ita hakarak hatún ba iha 25% ”, nia relata.

Nia esplika, ida-ne’e todan maibé husu ba ministériu sira katak tenke servisu ho diak atu bele hamenus má nutrisaun iha TL.

Nia esplika, planu asaun sira ne’ebé mak iha sei sai planu anuál ne’ebé kada ministériu sira implementa, hosi parte saúde nian sei haree oinsá inan isin rua no bebé ida ne’e improtante, entaun oinsá motiva inan sira atu fó susubeen ba nia oan sira to’o fulan neen mínimu.

“MSSI haree liu ba klasse ka populasuan sira ne’ebé mak vuneravel liu no mós tau matan ba bolsa mae no tau matan ba nutrisaun ba labarik sira. Ministériu Agrikultura nian, oinsá mak hasae produsaun no rai potensiál ne’ebé bele sai produsaun atu garante soberania ai-han”, nia haktuir.

Nia subliña, parte Ministériu Obras Publika haree liu ba bee moos, ba bee ne’ebé mak iha nutritivu hodi ita presiza ba ita-nia isin, agora parte Edukasaun haree liu ba merenda eskolár atu eduka no fó koñesimentu ba empreza oinsá mak ema iha koñesimentu di’ak ba ai-han nutrisaun ne’ebé mak dezde beiala sira han, entaun papel idaidak nian atu implementa polítika anuál ba orsamentu sira ne’e.

Servisu Unidade Misaun Kombate Stunting (UNMICS), Joel Maria Pereira, informa enkontru ohin ne’e atu aprova planu asaun nasionál raes badak no kombate stunting 2024-2024.

“Enkontru ne’e foka liu ba aprovasaun planu asaun nasionál raes badak no kombate stunting maibé ida-ne’e ita halo diskusaun ona iha fulan hira liu ba ho parseiru sira hotu, liña minsiteriál inklui soseidade sivil hodi halo diskusaun no validasaun ba dokumentu ida-ne’e. Maibé Governu liu hosi Gabinete Vise Primeiru Ministru na’in ru hanoin atu aprezenta dokumentu ne’e ba nivel Konsellu Minsitru atu hetan apresiaun no aprovasaun”, Joel Maria Pereira dehan.

Iha reuniaun ne’e partisipa hosi Vise Primeiru Ministru Koordenadór asuntu Ekonómiku no Ministru Turizmu no Ambiente, Vise Primeiru-Ministru no Ministru Koordenadór ba asuntu Sosiál, Ministériu Saúde, Ministériu Solidariedade Sosiál no Inkluzaun, Ministériu Planeamentu Investimentu Estratéjiku, Ministériu Justisa, Ministériu Agrikultura no Peskas, Ministériu Obras Públika, Sekretáriu Estadu Komunikasaun sosiál, Sekretáriu Estadu Igualdade Jéneru, UNMICS, inklui parseiru dezenvolvimentu sira.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!