iklan

EKONOMIA, INTERNASIONÁL, DILI, HEADLINE, POLÍTIKA

Horta ho Prezidente Angola diskute kooperasaun bilaterál

Horta ho Prezidente Angola diskute kooperasaun bilaterál

DILI, 09 jullu 2024 (TATOLI) – Prezidente Repúblika, José Ramos Horta no Prezidente Angola, João Lourenço, diskute kooperasaun bilaterál entre nasaun rua iha área oioin.

Hafoin termina sorumutuk entre Xefe Estadu nasaun rua, realiza kedan konferénsia imprensa konjunta iha Luanda, hodi konklui vizita Estadu daruak Ramos Horta nian ba Angola.

“Hasoru malu ho Prezidente Angola ne’e hatudu rezultadu di’ak no signifikativu hodi hametin lasu diplomátiku no ekonómiku sira entre nasaun rua ne’ebé ko’alia lian portugés,” tenik iha nota ne’ebé Agência TATOLI asesu husi media Palasiu Prezidensiál, ohin.

Iha konferensia imprensa ne’e, Prezidente Lourenço hateten, importansia husi simu malu iha relasaun internasionál sira, hodi fó sai ninia intensaun atu vizita Timor-Leste iha tempu badak.

Nia fó sai mós katak foin lalais ne’e Angola loke ona Embaixada ida iha Dili, hodi hadi’a lakuna anteriór iha reprezentasaun diplomátiku entre membru sira CPLP (Comunidade dos Países de Língua Portuguesa).

Durante konferénsia imprensa, líder rua ne’e ko’alia kona-ba asinatura husi akordu koperasaun oioin no ativasaun husi Komisaun Konjunta Bilaterál, ne’ebé Lourenço deskreve hanesan “instrumentu importante ida hodi halo buat sira akontese husi agora”.

Prezidente Angolanu subliña katak potensiál ba koperasaun entre nasaun rua ne’e laiha limite, subliña mós nesesidade atu identifika no aproveita oportunidade hirak ne’e.

Iha okaziaun ne’e, Prezidente Ramos Horta fó sai mós kona-ba posibilidade Timor-Leste sai membru ba da-11 husi ASEAN iha tinan 2025.

Timor-Leste tama ona ba membru permanente ASEAN potensiál ba aumentu kooperasaun ekonómika entre Timor-Leste no Angola, partikularmente tanba Timor-Leste nia asesu besik ona ba merkadu ASEAN nian ho millaun 700 konsumidór ho PIB kombinadu dolar biliaun $4.

Xefe Estadu Ramos Horta propoin atu Timor-Leste bele sai nu’udar sentru distribuisaun ba produtu sira husi nasaun Afrikanu Lian Portugés (PALOP) no CPLP iha rejiaun sudeste aziátiku.

Nune’e, nia alerta ba koperasaun prátika liu entre nasaun sira CPLP nian, hodi inziste mudansa hosi “deklarasaun romántiku” anuál sira ba rezultadu ekonómiku konkretu sira. Líder rua hatudu otimizmu kona-ba futuru relasaun bilaterál sira, ho Lourenço konvida Ramos-Horta atu “sente hanesan iha uma rasik” iha Angola.

Horta konvida Prezidente Angolanu vizita Timor-Leste

Iha sorumutu ne’e, Horta hato’o ona konvite formál ba Prezidente angolanu, João Lourenço atu mai vizita Timor-Leste iha tempu besik nune’e bele hametin liutan kooperasaun entre nasaun rua.

“Konvite ne’e hakarak hametin relasaun bilaterál sira no haree ba nesesidade importante iha interkámbiu diplomátiku sira ho nível aas. Prezidente Lourenço rekoñese katak ida ne’e Ramos Horta nia vizita daruak ba Angola, to’o agora laiha prezidente angolanu ida maka vizita Timor-Leste. Nia hatudu vontade atu hadi’a dezekilíbriu ida-ne’e no fó instrusaun ba kanál diplomátiku sira atu serbisu hodi determina data ida ne’ebé adekuadu ba vizita,” refere nota ne’e.

Proposta vizita husi Prezidente Lourenço ba Timor-Leste hein katak sei hasa’e liután kolaborasaun entre nasaun rua ne’e, partikularmente iha setór sira hanesan petróleu no gás, agrikultura, turizmu, no komérsiu.

 Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!