iklan

HEADLINE, POLÍTIKA

Ministériu Edukasaun la konsidera rezolusaun PN – Bankada opozisaun

Ministériu Edukasaun la konsidera rezolusaun PN – Bankada opozisaun

Imajen Tatoli/António Gonçalves.

DILI, 09 Jullu 2024 (TATOLI) – Bankada opozisaun, FRETILIN no PLP, kestiona Ministériu Edukasaun tanba la konsidera rezolusaun Parlamentu Nasionál (PN) ne’ebé aprova ona ho unanimidade hodi husu atu solusiona problema antigu profesór kontratadu sira.

Deputadu husi Bankada FRETILIN, Antoninho Doutel Sarmento, hatete Ministra Edukasaun, Dulce de Jesus, hamonu kredibilidade órgaun lejizlativu Parlamentu Nasionál tanba la kumpre rezolusaun PN, ne’ebé rekomenda ba Governu atu solusiona kestaun profesór kontratadu.

“Ministra Edukasaun, Dulce de Jesus Soares, la tau iha konsiderasaun atu ezekuta rezolusaun ne’e hodi rezolve problema profesór kontratadu sira-nia, tanba ne’e maka to’o ohin loron, profesór sira sei kontinua hala’o asaun pasífika hodi ezije sira-nia direitu atu hetan rekoñesementu husi Governu”, deputadu ne’e lamenta iha plenária, ohin.

Nune’e, nia husu ba Parlamentu Nasionál hahú husi prezidente to’o deputadu sira atu tau aas asuntu kona-ba rezolusaun ne’e, tanba hanesan deputadu ne’ebé reprezenta povu atu ko’alia no defende asuntu povu nian no direitu ema seluk nian ne’ebé la hetan tratamentu ida ho dignu.

“Presiza mós atu asegura no defende órgaun soberanu ida ne’e atu iha kredibilidade no autoridade nafatin. Tanba desizaun sira ne’ebé PN foti liuhusi rezolusaun ida tenke konsidera. Parlamentu Nasionál nu’udar orgáun soberanu ida ne’ebé lejitima husi povu hodi reprezenta povu tomak nia interese”, nia afirma.

Tanba ne’e, bainhira rezolusaun ida mak hetan ona aprovasaun iha uma fukun povu nian ho unaminidade, kuandu ministra ida la konsidera signifika la respeita mós povu ida ne’e. Ne’e duni, deputadu hotu iha PN tenke hatudu nia responsabilidade ida koletiva hodi husu ba Governu atu implementa rezolusaun ne’e.

“Se Governu ida liuhusi Ministra Edukasaun mak la kumpre ona rezolusaun ne’ebé aprova ona iha PN ho unaminidade ne’e, ita bele konsidera katak Parlamentu Nasionál nia funsaun nu’udar órgaun lejizlativu laiha ona. Se hanesan ne’e, Parlamentu Nasionál eziste atu halo saida tan”, deputadu Antoninho kestiona iha plenária.

Iha sorin seluk, deputada bankada PLP, Maria Angelina Sarmento, argumenta mós katak Ministra Edukasaun la preokupa ho rezolusaun ne’eb PN aprova, tanba ne’e maka profesór sira to’o ohin loron mós sei nafatin halo sira nia asaun pasífika.

“Ami bá vizita ona sela komandu Polísia munisípiu Dili hodi fó solidariedade ba profesór hamutuk na’in-31, inklui ema ho defisiénsia na’in-ida, ne’ebé polisia detein horisehik”, dehan.

Hanesan deputada lamenta tebes ho asaun Polísia nian hodi detein ona profesór no maluk defisiente ida ne’e no atu ida ne’e mai husi desizaun polítika Ministra Edukasaun nian atu profesór sira labele kontinua halo sira-nia asaun. Tanba ne’e, nia husu ba ministra atu buka ona solusaun hodi rezolve problema profesór sira-nia.

Nia kestiona mós katak, daudaun ne’e iha eskola barak mak falta manorin no estudante sira iha barak maka seidauk simu dixiplina ho kompletu. “Oinsá sira bele partisipa iha ezame segundu periódu ne’e ho di’ak. Tanba ne’e, ministra tenke asume ona responsabilidade ne’e ho másima atu hakotu ona problema profesór nian, atu edukasaun Timor-Leste labele sai grave liután”, nia sujere.

Lembra katak, iha 27 Maiu 2024, PN liuhusi reuniaun plenária aprova projetu rezolusaun númeru 38/VI(1a) ho unanimidade ho votu a-favór 59 no rekomenda ba Governu atu solusiona kestaun profesór kontratadu.

Rezulusaun ne’e ba dahuluk husu Governu atu realiza avaliasaun dezempeñu ba antigu profesór sira hotu, inklui reklamente sira, kontinua esforsu hotu hodi prosede kontratasaun profesór hirak ne’e, iha kazu hetan ona rezultadu di’ak iha avaliasaun. Instrui profesór sira atu kontinua konkorre iha kursu oioin rekrutamentu bolsa kandidatu.

Daruak, deklara apoia ba prosesu rekrutamentu pur méritu ne’ebé inisia husi Minitériu Edukasaun no Komisaun Funsaun Públika (KFP).

Notísia relevante: KNPK-TL ezije PM orienta ME ezekuta rezolusaun PN

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!