iklan

HEADLINE, POLÍTIKA

Opozisaun ezije kria Komisaun Inkéritu Parlamentár ba problema saúde

Opozisaun ezije kria Komisaun Inkéritu Parlamentár ba problema saúde

Deputada Membru Komisaun F hosi Partidu FRETILIN, Nurima Alkatiri. Imajen Tatoli/Francisco Sony

DILI,09 Jullu 2024 (TATOLI) – Deputadu na’in-24 husi bankada opozisaun FRETILIN, KHUNTO no PLP ezije atu kria Komisaun Inkéritu Parlamentár ida hodi halo investigasaun ba Ministériu Saúde relasiona ho keixa barak ne’ebé Parlamentu Nasionál (PN) simu, inklui númeru mortalidade ne’ebé aumenta iha Ospitál Nasionál Guido Valadares.

Portavós husi bankada FRETILIN, Nurima  Alkatiri, informa bankada opozisaun sira aprezenta rekerimentu inkéritu parlamentár tuir termu ne’ebé hakerek iha alínea b, númeru 1 iha artigu 2 no númeru 1 husi artigu 4 iha Lei númeru 4/2009, 15 de Jullu, kona-ba Rejime Jurídiku Inkéritu Parlamentár.

Iha konfrénsia imprensa ne’ebé bankada opozisaun tolu ne’e organiza, rekere ho obrigatoriedade atu harii Komisaun Inkéritu Parlamentár ida ne’ebé atu esklarese no atu tau-matan ba polítika atu sira ne’ebé responsabiza husi Governu nian.

Deputada Nurima esklarese katak subskritór sira husi bankada opozisaun rekere atu halo inkéritu ba iha Ministériu Saúde relasiona ho keixa ne’ebé foka liubá averiguasaun kona-ba falta ai-moruk no materiál konsumavel sira iha instalasaun saúde iha territóriu.

“Husi períodu fulan-Setembru 2023 to’o agora difikulta tebes atendimentu no tratamentu ba moras sira, inklui iha mós relasaun ho insidénsia mortalidade iha Ospitál Nasionál Guido Valadares. Apura no determina prosesu rekrutamentu profisionál saúde no tékniku aliadu sira ne’ebé hala’o husi Ministériu Saúde tuir duni baze legál no prosedimentu administrativu sira ka la’e”, deputada ne’e dehan.

Tanba ne’e, liuhusi estabelesimentu Komisaun Inkéritu ne’e atu buka hatene razaun objetiva ba terminasaun kontratu husi profisionál saúde no tékniku aliadu sira ne’ebé ho tempu naruk asegura servisu saúde ba populasaun.

Nia dehan kriasaun Komisaun Inkéritu ne’e nu’udar atu ida ne’ebé Parlamentu Nasionál halo hodi asume responsabilidade boot ba situasaun kolapsu ne’ebé sistema saúde hasoru ohin loron.

Nurima Alkatiri salienta Parlamentu Nasionál labele kumplise ba situasaun katástrofe ne’ebé akontese iha servisu saúde nasionál. Tanba ne’e, presiza apura no buka hatene hodi publiku iha esklaresimentu ida kona-ba faktu sira ne’ebé kauza lori servisu saúde sai grave liután. Liuhusi inkéritu parlamentár bele hetan medida korretiva iha nivel jurídika, polítika públika, administrasaun no jestaun.

“Medida sira ne’e bele tulun di’ak liután Parlamentu Nasionál no Governu kona-ba desizaun polítika no téknika ne’ebé nesesária atu foti hodi tulun Timor-Leste sai husi situasaun ida ne’e”, dehan.

Husi ezijénsia sira atu kria Komisaun Inkéritu ba Ministériu Saúde ne’e bankada opozisaun tolu sei aprezenta iha plenária tuirmai hodi bele hetan apresiasaun molok kria komisaun.

Notísia relevante: Komisaun F rekomenda MS aumenta profisionál saúde iha sentru-postu saúde sira

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!