iklan

NASIONÁL, EKONOMIA, INTERNASIONÁL, DILI, HEADLINE, POLÍTIKA

Timor-Leste ho Angola asina akordu vistu livre ba passaporte servisu no diplomátiku

Timor-Leste ho Angola asina akordu vistu livre ba passaporte servisu no diplomátiku

Imajen/Media MNEK

DILI, 08 jullu 2024 (TATOLI) –  Governu Timor-Leste ho Repúblika Angola asina ona akordu kooperasaun hodi fó vistu livre ba titular sira ne’ebé uza  passaporte servisu no  Diplomátika.

Akordu ne’e asina husi Ministru Negósiu Estranjeiru no Kooperasaun (MNEK), Bendito dos Santos Freitas, ho nia omólogu Ministru Relasaun Exterior Repúblika Angola, Téte António, hafoin remata enkontru tete-a-tete Prezidente Repúblika, José Ramos-Horta ho nia omólogu Prezidente Angola, João Lourenço, iha Palásiu Prezidensiál Luanda.

“Akordu izensaun vistu ba titular sira ba passaporte diplomátiku no passaporte servisu ne’e importante tebes, tanba bele fasilita di’ak liután movimentasaun entre ofisial diplomata Timor-Leste ho Angola nian, hodi bele hametin liután kooperasaun bilaterál iha futuru,” tenik iha nota ne’ebé Agência TATOLI asesu husi media MNEK, ohin.

Aleinde ne’e, Governu nasaun rua ne’e asina mós memorandu entendimentu hodi estabelese kooperasaun iha área konsulta polítika diplomátika no mós akordu kooperasaun entre Akademia Diplomátika “Venâncio de Moura” Ministériu Relasaun Exterior Angola ho Sentru Estudu Diplomátiku MNEK Timor-Leste.

Biban ne’e, Prezidente Repúblika Angola, João Lourenço, hateten maske Angola seidauk harii Embaixada iha Dili, maibé, delegasaun nasaun rua nian hala’o hela servisu no faktu hatudu, Timor-Leste ho Angola konsege asina instrumentu kooperasaun importante tolu ne’e, liuhusi vizita Estadu Prezidente Ramos-Horta nian.

“Ami nia delegasaun sira konserteza funsiona no ida ne’e prova husi faktu katak ami foin asina pesoalmente instrumentu kooperasaun balun entre ami nia nasaun,” Prezidente Angola tenik.

Potensiál ba kooperasaun entre nasaun rua laiha limite no tenke hatene  iha ne’ebé maka potensiál eziste no haree diretamente.

“Ami nia misaun atu koopera iha domíniu sira seluk iha domíniu turizmu, domíniu komérsiu,” Prezidente João afirma.

Prezidente Angola dehan tan, Timor-Leste ho Angola iha relasaun ne’ebé di’ak tebes hanesan mós nasaun membru CPLP ne’ebé durante tinan barak ona, tanba ne’e, presiza dezenolve liután kooperasaun iha setór importante seluk tan hodi fó benefísiu ba povu no nasaun rua ne’e.

Entretantu, Prezidente Repúblika, José Ramos-Horta, afirma asinatura ba akordu izensaun vistu ba titular sira ba passaporte servisu no diplomátiku ne’e hanesan relasaun esessionál no ezemplár husi planu polítika diplomátika pesoál ho nasaun membru CPLP hotu liu-liu ho Repúblika Angola.

Nune’e ho akordu ba izensaun vistu ne’e, bainhira Timor-Leste adere ona ba ASEAN, Timor-Leste bele sai hanesan armazein ba redistribuisaun protudu sira husi nasaun membru PALOP ho CPLP tama iha merkadu rejionál ASEAN.

“Ha’u fiar katak, ho ami nia adezaun ba ASEAN, hanesan ha’u nia konviksaun katak Timor-Leste bele sai hanesan armazein boot ba produtu sira husi nasaun PALOP ka CPLP ba sira nia redistribuisaun iha área referidu,” Xefe Estadu afirma.

Timor-Leste nu’udar membru ASEAN, halo parte iha merkadu rejionál ho konsumidór millaun 700 ho 4 triliaun PIB kombinadu husi nasaun sira ASEAN sira, tanba sei sai mós oportunidade boot ida ba CPLP ba implementasaun aktu kooperasaun balun ne’ebé estabelese ona.

Durante enkontru, Prezidente Repúblika, José Ramos-Horta extende konvite ba Xefe Estadu, João Lourenço, atu halo vizita ba Timor-Leste nu’udar aktu prinsípiu resiprosidade atu bele hametin liután amizade no kooperasaun entre nasaun rua.

Jornalista: Hortencio Sanchez

Editor: Florencio Miranda Ximenes

iklan
iklan

Leave a Reply

iklan
error: Content is protected !!