iklan

HEADLINE, SAÚDE

INSP-TL prosede semináriu sientífiku komemora Loron Nasionál Saúde

INSP-TL prosede semináriu sientífiku komemora Loron Nasionál Saúde

DILI, 10 jullu 2024 (TATOLI) – Ministériu Saúde liuhosi Institutu Nasionál Saúde Públika Timor-Leste (INSP-TL), hala’o semináriu sientífiku internasionál ba dala-tolu ho objetivu atu komemora Loron Nasionál Saúde ho tema Prevene no kuidadu hametin servisu saúde no rejiliénsia klimátika iha prevensaun ba moras lahada’et no moras mentál ba Timor-Leste ida saudavel liu.

“Semináriu ida-ne’e atu komemora Loron Nasionál Saúde, tanba ne’e ha’u rekoñese esforsu koletivu ne’ebé hala’o hela atu hadi’a no promove saúde di’ak iha Timor-Leste laran tomak, tanba ne’e ha’u hato’o ha’u-nia apresiasaun INSP-TL ba nia kompromisu hodi haburas diálogu no kolaborasaun entre péritu sira. Enkontru ida-ne’e sai hanesan plataforma ida atu troka hanoin no esperiénsia hodi hatudu polítika no programa sira ne’ebé bazeia ba evidénsia bainhira ita promove bem estar ba ita-nia povu”, Vise Ministru Instituisionál Saúde José dos Reis Magno, informa iha nia diskursu iha City8, Manleuana, ohin.

Nia dehan, iha tinan hirak ikus ne’e, Timor-Leste halo progresu signifikativu iha prestasaun kuidadu saúde no jestaun saúde públika. Estabelesimentu Institutu Nasionál Saúde Públika Timor-Leste sai nu’udar instrumentu hodi dudu ba oin prátika no polítika sira neʼebé bazeia ba evidénsia.

“Liuhosi inisiativa sira hanesan semináriu ida-ne’e, ita hakarak atu kontinua konstrui iha fundasaun sira-ne’e, hodi aproveita tantu perísia lokál ho kolaborasaun internasionál atu kontribui fó solusaun ba dezafiu saúde ho efetivu. Ha’u hakarak hato’o ha’u-nia agradese sinseru ba oradór sira, tantu internasionál no nasionál, ba ita boot sira-nia kontribuisaun no matenek ne’ebé sei fahe ho ami. Ita-boot sira nia informasaun hola parte krusiál iha ami-nia esforsu atu rezolve dezafiu saúde nian ne’ebé komunidade timorense hasoru hela”, nia esp-lika.

Nia agradese ba parseiru sira hanesan Menzies, ba sira-nia apoiu ne’ebé mak importante hodi promove área peskiza no haforsa servisu laboratóriu sira iha fasilidade saúde sira. Agradese mós ba OMS, ba sira-nia kontribuisaun bo’ot ba setór saúde no sira-nia papél signifikativu ba kolaborasaun atividade sira atu komemora Loron Nasionál Saúde tinan 2024.

“Moras la hada’et sira, reprezenta todan ida ne’ebé kada loron aumenta bebeik ba ita-nia sistema nasionál saúde, moras hirak ne’e kauza husi mudansa iha estilu moris nian, ne’ebé kada loron aumenta no fatór sosio ekonómiku sira. Moras kardiovaskular, diabetes no kankru sira mak entre kauza prinsipál ba mortalidade no morbilidade iha Timor-Leste”, nia subliña.

Moras sira-ne’e la’ós de’it impoen impaktu maka’as ba ema idaidak no família sira, maibé mós prejudika rekursu kuidadu saúde nian. Kada tinan Governu tenke refere pasiente barak ba rai liur tanba kestaun moras lahada’et. Atu rezolve kestaun ne’e, presiza aprosimasaun ida ne’ebé komprensivu ne’ebé abranje prevensaun, detesaun sedu, tratamentu no jestaun adekuadu. Ida-ne’e ezije atu haforsa liután baze fundamentál iha pilar sistema preventivu saúde mak promosaun edukasaun saúde komunitária no esforsu preventivu seluk ne’ebé foti hasoru situasaun ida-ne’e.

Iha fatin hanesan, Prezidente Institutu Nasionál Saúde Públika Timor-Leste (INSP-TL), Merita Monteiro dehan, atu komemora loron nasionál saúde ne’ebé monu iha loron 22 jullu ho tema ‘’Prevene no kuidadu hametin servisu saúde no rejiliénsia klimátika iha prevensaun ba moras lahada’et no moras mentál ba Timor-Leste ida saudavel liu.

“Relasiona ho tema ida-ne’e nian mak ita foku ba prevensaun kuidadu ba moras la hadaet sira no mós haree kona-ba mudansa klimátika no saúde mental”, Merita Monteiro esplika.

Nia haktuir, iha loron nasionál saúde ne’e sei realiza konsulta espesializadu ne’ebé sei hala’o iha Munisípiu Ermera no sei lori médiku espesialista hosi HNGV hodi konsulta espesilaizasaun no mós impelementa programa saúde ne’ebé fó prestaun saúde ba komunidade sira, hahú halo promosaun, prevensaun, halo diagnóstiku no halo tratamentu.

“Tanba ne’e, ita sei lori espesialista iha área oioin hanesan pediatria, jinekolojia, matan no mós sira seluk tan, tanba ita mós sei halo espozisaun iha Dili, demo kuking hosi grupu suporta inan sira hanorin inan feton sira oinsá prepara ai-han ne’ebé mak di’ak, liuliu produtu lokál ne’ebé mak iha atu prepara ai-han ne’ebé mak saudavel ba família sira.

Laboratory and Health System strengthening Technical Advisor and Co-chair of Menzies TL strategic Reference Group, Luxender Hanjam, informa Menzies Timor-Leste hahú ninia parseria ho Ministériu Saúde ho Ministériu Agrikultura, Pekuaria, Peskas no Floresta iha tinan 2018 parseria ida ne’ebé tempu ba tempu aumenta forte ba bebeik. Menzies iha Timor-Leste halao nia kna’ar iha área temátika tolu, haforsa sistema laboratóriu,Vijilánsia/Peskiza no Klínika no resposta ba moras infesaun iha Timor-Leste liuhusi servisu rutina no mós peskiza. Menzies implementa nia kna’ar hirak ne’e uza métodu mentoria ka kapasitasaun ho modelu akompaña- side-by-side mentoring.

“Hanesan timoroan ne’ebe servisu ho Menzies kleur ona, ha’u ho laran ksolok akompaña no haree mudansa barak iha peskiza saúde ka Health Research iha Timor-Leste ne’ebé aumenta forte ba bebeik ho peskiza sira ne’ebé lidera rasik husi timoroan iha Institutu Nasionál Saúde Públiku. Menzies Timor-Leste ne’ebé 80% hosi funsionáriu timoroan, kontinua hatudu komitmentu di’ak, forte hodi servisu hamutuk ho pesoál saúde sira iha área klínika, laboratóriu, vijilánsia no peskiza hodi hare ba asuntu no dezafiu ne’ebé sai prioridade ba Ministériu Saúde laos prioridades ne’ebé parseiru ka ajensia sira mak impoin”, Luxender Hanjam afirma.

Menzies prontu nafatin hamrik iha Ministériu Saúde nia sorin hodi haforsa sistema saúde ho kompromisu atu haforsa kontrolu moras infesioza hanesan Resistensia Antimicrobiana/AMR, TB, HIV SIDA no dengue liuhusi implementasaun projetu Woolbachia.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!