DILI, 10 jullu 2024 (TATOLI) – Governu liuhusi reuniaun Konsellu Ministru, kuarta ne’e, aprova projetu Dekretu Governu ne’ebé aprezenta husi Ministru Komérsiu no Indústria, Filipus Nino Pereira, hodi regula prosedimentu lisensa no inspesaun no mós aprova modelu formuláriu no impresu iha ámbitu lisensiamentu komersiál no industriál.
“Diploma sira ne’e aplika ba estabelesimentu ne’ebé empreza sira ezerse sira-nia atividade industriál ka komersiál ne’ebé klasifika hanesan risku médiu no risku aas hodi halo operasaun iha territóriu nasionál no estabelese prosedimentu, formuláriu no impresu ne’ebé presiza ba lisensiamentu atividade sira ne’e,” relata Vise-Ministru Asuntu Parlementar, Aderito Hugo da Costa, iha Palasiu Governu-Dili.
Objetivu prinsipál husi dekretu Governu ne’e mak atu garante katak abertura, alterasaun ka renovasaun ba estabelesimentu komersiál ka industriál tenke hahú uluk ho inspesaun ne’ebé rigoroza, no asegura kondisaun funsionamentu, seguransa, ijiene no saúde públika ne’ebé adekuada.
Diploma sira ne’e prevee mós elaborasaun ba auto inspesaun ida ne’ebé deskreve kondisaun jerál husi instalasaun, no identifika observasaun no rekomendasaun sira.
Jornalista: Hortencio Sanchez
Editór: Florencio Miranda Ximenes
