MI aprezenta relatóriu vizita Ruanda ba Konsellu Ministru
DILI, 10 jullu 2024 (TATOLI) – kuarta ne’e iha Palásiu Governu Dili iha reuniaun Konsellu Ministru (KM) asiste aprezentasaun relatóriu vizita ba Ruanda iha ámbitu g7+, ne’ebé hala’o husi Ministru Interiór (MI), Francisco da Costa Guterres, no husi reprezentante sira g7+ nian no ekipa interministeriál ne’ebé partisipa iha misaun ne’e.
Objetivu husi vizita ida-ne’e maka atu observa rekuperasaun signifikativa sosiál iha Ruanda husikedas jenosídiu tinan 1994.
Daudaun ne’e, Ruanda aprezenta modelu ida ba dezenvolvimentu ne’ebé konsidera hanesan ezemplu ba país sira ne’ebé iha hela dezenvolvimentu, ne’ebé foka-liu ba progresu infraestrutura, investimentu iha teknolojia, reforsa lei no orden, atrai investidór sira no dezenvolvimentu setór turizmu.
“Misaun ne’e mak atu troka esperiénsia no aprendizajen entre Ruanda no Timor-Leste, permite membru delegasaun timoroan observa besik prátika ne’ebé implementa ho susesu iha Ruanda. Objetivu importante seluk mak atu estabelese kontaktu ho Governu ruandés, ho objetivu atu país rua ne’e kolabora iha futuru,” Vise-Ministru Asuntu Parlamentar Aderito Hugo da Costa.
Delegasaun timoroan, kompostu husi membru 16 no lidera husi Vise-Ministru Administrasaun Estatál, Jacinto Rigoberto Gomes de Deus, inklui reprezentante husi ministériu relevante balun no akompaña husi ekipa g7+ ne’ebé fasilita ona misaun ne’e.
Vizita ida-ne’e, hala’o husi loron 12 to’o loron 17 fulan-maiu tinan 2024, fó ona lisaun no perspetiva valioza ba dezenvolvimentu Timor-leste nian.
Jornalista: Hortencio Sanchez
Editór : Florencio Miranda Ximenes
