DILI, 11 Jullu 2024 (TATOLI) – Prezidente Komisaun Funsaun Públika (KFP), Agostinho Letêncio de Deus, husu ba funsionáriu públiku atu labele publika informasaun laloos ba públiku relasiona ho serbisu instituisaun públika nian, tanba ne’e kontra regra administrasaun públika.
Dirijente ne’e husu ba diretór-jerál, diretór nasionál no autoridade sira ne’ebé envolve aan iha governasaun ida ne’e atu buka komprende didi’ak étika administrasaun públika nian, nune’e labele hetan sansaun hodi prezudika fali karreira funsionáriu ida nian iha futuru.
“Ha’u husu ba ema hotu hanesan funsionáriu públiku atu proíbe halo publikasaun ruma iha mídia sosiál sira ba buat ne’ebé konsidera laloos”, Agostinho Letêncio hato’o iha nia diskursu, iha Sentru Kulturál Indonézia, Mascarenhas, ohin.
Tuir nia, funsionáriu sira ne’ebé la kumpre étika administrasaun públika, KFP sei foti medida ruma hasoru sira no sei prosesa tuir lei ne’ebé vigora. Hodi hatutan katak sai nu’udar funsionáriu públiku buka atu koopera ho dirijente sira iha instituisaun nia laran atu serbisu ho imparsialidade no justu hodi asegura buat ne’ebé konsidera konfidensiál.
Nia fó ezemplu, iha semana kotuk, iha funsionáriu ida husi Ospitál Nasionál Guido Valadares (HNGV) fó sai fotografia ema mate ba ema seluk atu públika iha mídia sosiál.” Funsionáriu ne’e laiha relasaun ho mate ne’e rasik. Hakarak dehan kuandu laiha relasaun ho ema ne’ebé mate loloos laiha dalan ida atu hasai mate ne’e nia fotografia. Aat liután maka fotografia ne’e fó fali ba ema seluk hodi halo publikasaun”, nia lamenta.
Dirijente ne’e esplika katak funsionáriu públiku iha nia kódigu étika administrasaun no tenke respeita direitu ema seluk nian. Kuandu funsionáriu ida mak públika buat ne’ebé di’ak konsidera promove instituisaun públika nia naran ba iha públiku.
Vise-Ministru Asuntu Parlamentár, Adérito Hugo da Costa, realsa katak durante mandatu Governu ida ne’e iha informasaun barak maka fó sai iha rede sosiál sira relasiona ho serbisu governasaun ida ne’e nian, balun faktu no balun hoax. Tanba ne’e, Governu kria enkontru ho dirijente sira hodi husu funsionáriu sira atu divulga informasaun ne’ebé loos.
“Tanba iha funsionáriu públiku sira barak mós halo ona hahalok hodi divulga informasaun ne’ebé laloos. Hanesan funsionáriu públiku labele haluha regra sira, iha Komisaun Funsaun Públika mós iha regra no sansaun sira karik funsionáriu sira la kumpre. Ne’e la’ós ameasa, maibé regra serbisu profisionál Funsaun Públika nian, tanba kada rekrutamentu no kada formasaun sempre iha kódigu konduta funsionáriu públiku nian. Kuandu hakarak divulga informasaun ida ba públiku tenke ho loloos”, nia fó hanoin.
Notísia relevante: KFP aprezenta ba KM kona-bá prespetiva reforma Funsaun Públiku
Jornalista: Tomé Amado
Editora: Maria Auxiliadora
