DILI, 11 Jullu 2024 (TATOLI) – Ministériu Prezidénsia Konsellu Ministru, liuhusi Gabinete Asuntu Parlamentár (GAP) organiza enkontru ho dirijente sira husi liña ministeriál hodi diskute kona-ba kriasaun rede pontu fokál iha kada instituisaun hodi responde ba preokupasaun husi deputadu sira iha Parlamentu Nasionál (PN).
Vise-Ministru Asuntu Parlamentár, Adérito Hugo da Costa, haktuir nu’udar reprezentante Governu iha Parlamentu sempre alista saida maka deputadu sira levante iha plenária no preokupasaun sira ne’e hotu hato’o ba kada liña ministeriál, maibé dalaruma ladún fó resposta ho efetiva.
“Ne’e duni ho reuniaun ne’ebé halo diretamente ho diretór-jerál, diretór nasionál no entidade sira hotu ne’ebé envolve iha governasaun ida ne’e atu hamutuk ko’alia kona-ba preokupasaun ne’ebé deputadu sira foti iha Parlamentu relasiona ho serbisu Governu nian”, Adérito Hugo dehan iha Sentru Kulturál Indonézia, Mascarenhas, ohin.
Tuir nia, dalabarak preokupasaun deputadu ka bankada parlamentár sira foti ladún iha resposta husi ministériu ka entidade sira, nune’e maka GAP kria enkontru anuál ne’ebé prevee iha planu Ministériu Prezidénsia Konsellu Ministru nian hodi koordena ho liña ministeriál hotu relativa ba serbisu korrespondénsia sira entre Parlamentu no instituisaun hotu bele la’o ho di’ak.
Vise-Ministru ne’e dehan reuniaun ida ne’e atu halo mós avaliasaun ba korrespondénsia sira ne’ebé halo, através GAP ho entidade hotu, nune’e karta sira ne’ebé envia husi intervensaun deputadu sira-nia iha loron segunda no tersa kona-ba deklarasaun polítika, petisaun ka dokumentu sira bele hetan lalais resposta husi Ezekutivu.
“Liuhusi reuniaun ho liña ministeriál sira ne’e atu ajuda Governu bele dezeña komunikasaun ida efetivu hodi bele fó resposta ba pergunta públiku sira-nia ne’ebé levanta husi deputadu sira iha PN”, afirma.
Husi pontu ne’ebé esplora iha enkontru ne’e, GAP sei kria tan kondisaun atu halo liña koordenasaun ida efetiva ho ministériu sira, nune’e bele fó dalan ida ba resposta ne’ebé rápida ba asuntu saida de’it maka hato’o husi membru parlamentu ka bankada sira.
“Husi aprezentasaun estatístika husi liña ministériál hahú husi tinan kotuk to’o tinan ida ne’e, sura husi Janeiru to’o tinan klaran, resposta ne’ebé liña ministeriál sira hato’o relasiona ho intervensaun deputadu sira-nia iha PN ne’e, iha ministériu balun maka responde ho lalais, balun sei lentu hela no balun laiha liu resposta”, adianta.
Tanba ne’e, iha enkontru avaliasaun ne’e husu instituisaun hotu nia responsabilidade atu ativa liután bainhira iha intervensaun husi deputadu sira kona-ba suntu pertinente ruma relasiona ho serbisu sira, idaidak bele fó resposta lalais.
Diretora-Jerál ba asuntu ASEAN husi Ministériu Negósiu Estranjeiru no Kooperasaun, Elisa da Silva, dehan kuandu preokupasaun sira ne’ebé deputadu sira levanta kona-ba serbisu ministériu nian, liuliu kona-ba asuntu ASEAN nian sira sempre buka meiu atu rekolla informasaun husi diresaun sira hodi bele responde preokupasaun sira ne’ebé maka PN kestiona.
Dirijente ne’e apresia ho esforsu ne’ebé Gabinete Asuntu Parlamentár halo hodi organiza enkontru ida ne’e hodi divulga informasaun ba liña ministeriál hotu.
“Divulgasaun informasaun ida ne’e sai benefísiu ida ba ha’u, tanba bele komprende ho didi’ak lala’ok serbisu deputadu sira-nian no Vise-Ministru Asuntu Parlamentár nian, nune’e bele fasilita ami iha MNEK bele prepara resposta ruma bainhira deputadu sira presiza”, salienta.
Diretora ne’e hatutan kuandu iha kada ministériu kria pontu fokál ida bele apoia informasaun ba membru parlamentár sira, tanba husi liña koordenasaun sira ne’e maka bele tulun malu atu hadi’ak serbisu sira ne’ebé durante ne’e la’o ladún efetivu iha liña ministeriál sira.
Jornalista: Tomé Amado
Editora: Maria Auxiliadora
