DILI, 11 jullu 2024 (TATOLI) – Durante vizita Estadu iha Angola, país amigu no membru diretu plenu ida ba CPLP, Prezidente Repúblika José Ramos Horta vizita mós Institutu Superiór Siénsia Polisiál no Kriminál hodi haree kualidade servisu ne’ebé iha no nia husu instrutór Polísia iha país luzófonu ne’e atu apoia Polísia Nasionál Timor-Leste (PNTL) liuhusi fó formasaun hodi aumenta liutan koñesimentu iha área investigasaun kriminál.
“Ita propoin atu haruka instrutór Polísia angolanu sira ba Díli ba programa formasaun sira, iha área investigasaun kriminál nian,” Prezidente Horta tenik liuhusi nota ne’ebé Agência TATOLI asesu husi media Palásiu Prezidensiál, ohin.
Horta argumenta katak aprosimasaun ida-ne’e sei fó benefísiu barak liu ba ofisiál timoroan sira duké haruka grupu ki’ik sira ba Angola, no hato’o nia intensaun atu diskute proposta parseria ida-ne’e ho Ministru Interiór Timor-Leste nian.
Durante iha Akademia Polísia Nasionál Angola nian, Ramos Horta fahe mós esperiénsia kona-ba luta Timor-Leste nian ne’ebé hala’o ba independénsia entre Angola no Timor-Leste.
Prezidente esplika ligasaun paralelu entre Timor-Leste nia independénsia iha tinan-2002 no Angola nia prosesu ba libertasaun iha tinan-1975, hodi elojia Angola nia solidariedade dahuluk ho Timor-Leste nia direitu ba auto-determinasaun.
Ramos Horta mós fahe kona-ba Timor-Leste nia esforsu konstrusaun Estadu ne’ebé la’o daudaun, partikularmente iha dezenvolvimentu forsa PNTL.
Horta esplika katak, Timor-Leste mantein 60% husi pesoál Polísia anteriór sira no hetan ona benefísiu husi parseria internasionál sira iha formasaun Polísia no Militár nian, liuliu ho Austrália no Portugal.
Xefe Estadu hatudu admirasaun ba progresu Angola nian, deskreve hanesan nasaun ida-ne’ebé prometidu liu iha mundu.
Nune’e, Horta mós sujere atu Angola bele sai kandidatu forte ida ba kadeira permanente ida iha Konsellu Seguransa ONU nian ne’ebé maka posibilidade atu reforma.
Jornalista: Hortencio Sanchez
Editór: Rafael Ximenes de A. Belo
