PR Horta inaugura Embaixada Timor-Leste iha Angola
DILI, 10 jullu 2024 (TATOLI) – Prezidente Repúblika, José Ramos Horta, akompaña husi Ministru Negósius Estranjeirus no Kooperasaun (MNEK), Bendito dos Santos, ofisialmente halo abertura Embaixada ba missaun diplomátika Timor-Leste nian iha Repúblika Angola.
Biban ne’e, Xefe Estadu agradese ba serenidade no protidaun Governu Angola nian, ne’ebé atribui ona propriedade no edifísiu hodi loke Timor-Leste nia Embaixada sira-nia nasaun.
“Governu Angola, ba ninia serenidade no prontidaun atu fó espasu ba ami ba embaixada, ami iha ona Embaixadór Angola ida iha Timor-Leste, ami iha ona Embaixadór ida ne’ebé dezignadu, tanba ne’e bainhira de’it ha’u fila mai Dili ha’u iha ona enkontru ida ho nia atu fó kredensial sira,” Xefe Estadu, Ramos Horta tenik liu husi nota ne’ebé Agência TATOLI asesu husi media MNEK, ohin.
Molok abertura, Ministru Negósius Estranjeirus no Kooperasaun Timor-Leste, Bendito Freitas hala’o uluk enkontru bilaterál ho nia omólogu Ministru Relasaun Exteriór Repúblika Angola, Téte António, hodi diskute no troka resiprosidade espasu ba funsionamentu embaixada Timor nian iha Angola no vise-versa.
“Husi Angola sira fó espasu mai ita ne’ebé lokraik ne’e sua eselénsia señór Prezidente Repúblika mak sei rasik haree no mós simu propriedade ne’e husi Governu Angolanu. Nune’e mós husi parte Timorense, ita mós prepara ona hato’o ona pedidu ba Ministériu Justisa atu fó fatin própriu iha Timor-Leste nian ba operasaun Embaixada Angola nian iha Timor-Leste,”Ministru Bendito tenik.
Nune’e mós Ministru Negósiu Estranjeiru Repúblika Angola, Téte António reforsa, Governu Timor-Leste mós oferese ona fasilita ba Governu Angola atu loke Embaixada iha Dili.
“Ami iha ona fasilidade iha Dili, tanba ne’e ami mós hetan ospitalidade husi Governu Timor-Leste, Sua Exelénsia, Sr. Prezidente, halo tiha ona ida-ne’e possível, ami-nia embaixadór vizita tiha ona Dili, ami halo prátikamente buat hotu iha tempu hanesan, Timor-Leste iha ne’e, Repúblika Angola iha ne’ebá,” Teté António katak.
Xefe Diplomasia Angolanu ne’e haktuir pensamentu husi fundadór no Líder Boot Angola nian, saudozu António Agostinho Neto katak, saida mak konta ho sira la’ós distánsia jeografia, maibé, ideolojia, tanba ne’e tenki konsolida amizade no solidariedade entre povu nasaun rua ne’e.
Entretantu, oferta embaixada Timor-Leste husi Governu Angola. Ida-ne’e haree hanesan misaun ne’ebé di’ak liu no espasu ho vista ne’ebé furak tebes iha kapitál nia fuan, minutu lima ba Ministériu hotu-hotu no Asembleia Jerál Repúblika no seluk tan.
Nível hotu-hotu husi edifísiu ida-ne’ebé lokalizada iha andár 13 ho kuartu barak no sala vizita boot sira. Vizaun ba loro-matan monu husi embaixada. Ida-ne’e maka Angola nia amizade rohan-laek ho Timor-Leste. Ne’e la’ós jeografia, ne’e amizade, Timor-Leste tenke retribui di’ak tebes ho Angola.
Abertura ba Embaixada ne’e, Governu Angola ne’ebé reprezenta husi Ministru Relasaun Externa, Téte António maka entrega orfisialmente xave edifísiu foun Embaixada Timor-Leste nian ba Ministru Negósius Estranjeirus no Kooperasaun, Bendito Freitas, iha ámbitu vizita estadu Prezidente Repúblika, José Ramos-Horta nian ba Angola.
Jornalista: Hortencio Sanchez
Editór: Florencio Miranda Ximenes
