Dom Leandro: Prezensa Papa Francisco refleta domin mai sarani Timor-Leste
BAUCAU, 12 jullu 2024 (TATOLI) – Bispu Diozese Baucau, Dom Leandro Maria Alves konsidera prezensa Papa Francisco hatudu domin mai sarani Timor-Leste.
Bispu Lenadro, hateten, Papa Francisco nu’udar susesór São Pedro no lideransa másimu Igreja Katólika iha mundu nune’e vizita durante loron-tolu uha fulan-setembru mai atu hametin liután fiar sarani iha Timor-Leste.
“Amu Papa mos hatudu nia domin, laloos de’it iha dook maibé mai to’o iha-ne’e ita atu konfirma kona-ba ita-nia fiar iha Kristu,” Bispu Diozese Baucau hateten iha Vila Antiga, sesta ne’e.
Dom Leandro, konsidera liuhusi Papa Francisco nia vizita nu’udar grasa ba Estadu Timor no sei fó bensaun ba sarani katóliku iha rai lorosa’e, tanba ne’e líder diozese Baucau husu povu atu kria pás no domin.
“Ida-ne’e hatudu katak ita-nia saudade boot tebes atu hasoru ka hetan grasa husi Maromak liuhusi Amu Papa rasik,” Dom Leandro akresenta.
Tuir planu Papa Francisco sei vizita Timor-Leste durante loron-tolu hahu loron 09 to’o 11 setembru no munisípiu Baucau sei prepara sarani hamutuk rihun 50 hodi partisipa iha selebrasaun misa iha Tasitolu, Dili.
Jornalista : Natalino Belo
Editór : Evaristo Soares Martins
