DILI, 12 jullu 2024 (TATOLI)– Jestór Merkadu Taibesi, Carlos Borjes da Silva, hateten negosiante sira husi munisípiu tenke okupa faan iha terminál laran no iha trotoar leten, tanba espasu iha merkadu Taibesi ne’e labele akumula negosiante sira hotu.
“Ita-nia inan-aman sira husi munisipiu sira-ne’e, balun faan iha terminál no iha dalan ninin tanba fatin ba sira-ne’e laiha duni,” Jestór Merkadu Taibesi, Carlos Borjes da Silva, hateten ba Agência Tatoli, iha merkadu Taibesi, sesta ne’e.
Nia hateten, iha tinan 2023, totál vendedór permanente ne’ebé okupa iha merkadu hodi ne’ebé faan sira-nia sasán iha merkadu Taibesi ne’e hamutuk 1.491.
“Antes ne’e númeru boot tebes. Maibé altura COVID-19 ne’e, ema barak fila-fali ba sira-nia munisipiu entaun númeru ne’e menus tiha. Maske nunu’e, fatin ka espasu ba vendedor sira la to’o nafatin. Ami hakarak jere didi’ak atu bele koloka negosiante sira hotu faan iha faan iha laran maibé susar tebes,” nia hateten.
Husi totál númeru ne’e, nia dehan, jestaun merkadu la konta ho sira ne’ebé faan iha terminál laran no faan iha dalan ninin sira-ne’e.
Nia dehan, jestaun merkadu defísil atu kontrola tanba to’o ohin loron laiha moru protesaun no merkadu Taibesi ne’e rasik hanesan fatin konsentrasaun ba negosiante sira husi munisípiu 12 seluk mai konsentra halo negósiu iha merkadu ne’e.
“Ita hatene, merkadu Taibesi ne’e fatin konsentrasaun ba negosiante sira husi munisipiu hotu-hotu. Sira tama mai, loron no kalan, sira lori sira-nia produtu lokál sira mai faan iha fatin ne’e,” nia hateten.
Tuir nia, ninia parte aprezenta ona pedidu ba Governu atu bele konstrui moru protesaun ba merkadu Taibesi ne’e.
Tuir observasaun, vendedór kioske no negosiante sira faan produtu lokal no faan roupa uzadu (obralan) ne’e kontinua hala’o atividade faan iha terminál laran no dalan ninin iha iha merkadu Taibesi.
Jornalista : Jesuína Xavier
Editór : Cancio Ximenes
