Progresu konstrusaun kapela iha Macadique atinje 50%
VIQUEQUE, 12 jullu 2024 (TATOLI)- Xefe Suku Macadique, Postu administrativu Uatulari, Munisípiu Viqueque, Afonso dos Reis ‘Ferlimo’, informa progresu konstrusaun fíziku kapela ba sarani sira iha Macadique atinje 50%.
Kapela ne’e konstrui iha tinan 2017, liuhusi inisiativa komunidade sira nia hodi tau hamutuk osan no hetan apoio fundu balun husi Gabinete Apoia Sosiedade Sivil no Dioseze Baucau.
“Kapela ne’e ami hahú konstrusaun 2017 to’o agora konstrusaun la’o no atinje 50%. Tanba reboka hotu ona, uma nian kuda-kuda ami hasa’e hotu ba uma leten. Lolos ne’e kuda-kuda sa’e ona tinan 2023, maibé kuda-kuda todan nune’e ha’u kolabora fali ho sarani sira maka foin hasa’e”, Afonso dos Reis ‘Ferlimo’, hateten ba jornalista Agência, iha postu Uatulari, ohin.
Afonso hatutan, molok hahú obra referida sarani hamutuk ho autoridade suku Macadique kria komisaun ida hodi tau matan ba konstrusaun, foin lalais maka komisaun deside tán bolu bada’en sira hamutuk ho sarani suku Macadique kontinua konstrui tan kapela ne’e.
“Daudaun ne’e, badaen no komunidade sira hahú prepara atu taka kalen, ami tarjetu kapela Macadique sei finaliza iha tinan ida-ne’e. Konstrusaun ne’e kuaze tinan 9 tanba komisaun enfrenta difikuldade oin-oin. Maibé, komunidade no sarani sira sei iha vontade apoia to’o finaliza kapela ne’e”, nia afirma.
Konstrusaun kapela Macadique ho medida metru 9×25 ne’ebé hetan fundu no kontribuisaun kada sarani iha suku Macadique $5 , fundu balun mai husi Gabinete Apoiu Sosiedade Sivil rihun $25 no apoia husi Dioseza Baucau aloka tuir faze dahuluk montante $12.000, ba faze daruak $25.000 no faze datoluk montante $45.000.
Tuir dadús suku Macadique iha aldeia hamutuk 21, ho total uma-kain 1.773 no totál populasaun na’in-7.482, kompostu hosi mane na’in- 3.852 no feto na’in-3.630.
Jornalista : Vitorino Lopes da Costa
Editór : Florêncio Miranda Ximenes
