DILI, 14 jullu 2024 (TATOLI) – Amu selebrante iha misa domingu baibain da-15, Reniel Nachimma, SVD, iha nia omília hateten Maromak haruka ema idaidak sai misionáriu ba nia aan.
“Maromak liuhusi nia oan mane mesak Jesus haruka ita hotu sai misionáriu ba ita idaidak nia situasaun, tanba sai misionáriu la’ós de’it tenke padre, madre, maibé ema hotu tanba Maromak fó responsabilidade ba ita idaidak hala’o misaun moris nian iha mundu ida ne’e”, Padre Reniel Nachimma esplika iha Kapela Menino de Jesus Praga, Manleuna, Dili, ohin.
Nia salienta katak misionáriu ba idaidak nia aan signifika sai kaben-na’in iha uma laran karik sai misionáriu ba oan sira, eduka oan sira sai sarani no oan ne’ebé di’ak no ba ukun-na’in sira karik sai misionáriu ba nia povu, ukun ho domin, tanba Maromak fó responsabilidade ba ema idaidak hala’o misaun iha mundu ne’e.
“Bainhira ita hala’o misaun sira ho di’ak hanesan tulun malu iha susar laran, hakbesik ba Maromak iha situasaun saida de’it no nafatin agradese, perdua malu. Ida ne’e mak sei lori ita ba moris rohan-la’ek nian. Ita mate la lori rikusoin mundu nian no Maromak mós la husu ó nia rikusoin hira mak iha mundu, maibé Maromak sei haree sá di’ak mak ó halo durante sei moris iha mundu”, nia hato’o.
Saserdote ne’e hatutan katak evanjellu ohin mós hanorin katak Jesus haruka nia eskolante sira bá kada sidade hodi haklaken Na’i nia liafuan.
“Jesus husu sira bá karik labele lori sasán barak no hahán barak, husik sasán no hahán sira ne’e ba ema seluk, maibé bá lori de’it buat rua maka ai-tonka no sandalla. Ida ne’e hanorin mai ita katak labele preokupa liu rikusoin mundu nian, maibé oinsá hakbesik ó nia aan ba Maromak, basá ita mate atu tama lalehan sei lalori rikusoin mundu nian, maibé ita-nia fiar mak lori ita. Bainhira ita fiar iha Jesus mak nia espiritualidade hamutuk nafatin ho ita to’o mate”, padre konklui.
Jornalista: Arminda Fonseca
Editora: Maria Auxiliadora
