Komisaun distribui ona formuláriu rejistu sarani Viqueque bá partisipa misa iha Tasi-Tolu
VIQUEQUE, 15 jullu 2024 (TATOLI)- Komisaun Sekretáriu Munisípiu Viqueque ba vizita Amu Papa mai Timor Leste, segunda ne’e, hahú distribui formuláriu ba kada Parókia sira hodi rejista sarani sira bá partisipa misa solone iha loron 10 setembru, iha Tasi-Tolu, munisípiu Díli.
“Ami prepara formuláriu no distribui ona ba Parókia sira atu rejista sarani sira bá simu Amu Papa no partisipa mós misa iha Tasi-Tolu”, Sekretáriu munisípiu, Simões da Silva, hateten ba Agência Tatoli, iha resitu administrasaun Viqueque, ohin.
Formatu rejistu sarani sira-ne’e distribui ona ba Parókia Lacluta no Parókia Viqueque , maibé Parókia tolu hanesan Uatucarbau, Uatulari no Ossú mak seiduak simu.
“Ami esforsu hela atu distribui ba Amu Parókia sira hodi bele deside nia oráriu hodi halo rejistrasaun ba sarani sira”, nia hato’o.
Iha formatu rejistu sarani sira tenke lori dokumentu hanesan Sertidaun Baptismu, Eleitorál, Billete Identidade (BI), foto koloridu 3×4 no karik iha passaporte bele lori.
Nia afirma orientasuan husi Primeiru Ministru (PM) ba munisípiu Viqueque sarani hamutuk rihun 50, munisípiu Viqueque Parókia hamutuk lima ne’ebé kada parokia ida sei rejista ema rihun-10 hodi bá partisipa no simu Amu Papa mai Timor-Leste. Kona-ba transporte parte Governu mak sei prepara,” nia afirma.
Iha fatin ketak, Amu Paróku Santo Antonio Lacluta, Abel Soares Alves, informa simu ona formatu no parokia taka sai ona avizu iha kartóriu parókia no taka iha edefísiu administrasaun postu atu sarani sira bele asesu no bele ba rejista.
“Formatu rejistu sarani sira-ne’e, ohin mak ha’u simu husi komisaun minisípiu Viqueque nian ne’ebé ami mós fó sai ona ba sarani sira atu mai rejistu. Tuir planu ami-nia prosesu rejista sei hahú iha semana ida-ne’e nian”, nia afirma.
Daudaun ne’e, Parókia Lacluta prepara komisaun ema na’in-80 mak sei halo atendimentu ba sarani sira husi postu Lacluta.
Jornalista : Vitorino Lopes da Costa
Editór : Florencio Miranda Ximenes
