ACLAM-TL rejeita lideransa foun iha INSP-TL
DILI, 16 jullu 2024 (TATOLI) – Asosiasaun Sientista Laboratóriu Médika Timor-Leste (ACLAM-TL), rejeita lideransa foun ne’ebé nomeadu hodi okupa kargu iha Laboratóriu Saúde, iha Institutu Nasionál Nasionál Saúde Públika (INSP-TL), tanba konsidera iha invazaun ba profisionál laboratóriu no sei harahun sistema asisténsia laboratóriu iha Timor-Leste.
“Haree ba nomeasaun ba kargu diretór sira iha Laboratóriu Saúde (INSP-TL), hosi komisaun Funsaun Públika neʼebé propoin hosi Ministra Saúde ne’ebé konsidera iha tendénsia grupuizmu no la bazeia ba kritériu selesaun ho méritu no kritériu profisionál ka esperiénsia iha área laboratóriu mak ACLAM-TL hola pozisaun hanesan tuir mai, dahuluk rejeita totál lideransa foun sira ne’ebé nomeadu hodi okupa kargu iha laboratóriu saúde INSP-TL, tanba konsidera iha invazaun ba profesionál laboratóriu no sei harahun sistema asisténsia laboratóriu iha ita-nia rain”, Prezidente ACLAM-TL, Augusto Mendonça, informa liuhosi konferénsia imprensa, iha Bidau Tokobaru, ohin.
ACLAM-TL ezije ba Prezidente Komisaun Funsaun Púbilka atu dada hikas nomeasaun ne’ebé rekomenda hosi Ministra Saúde ne’ebé konsidera iha tendénsia grupuizmu no familiarizmu.
“Ami rekomenda ba Ministra Saúde atu propoin kandidatu ho Background Laboratóriu no iha esperiénsia ba servisu laboratóriu hodi bele halo melloramentu ba servisu tékniku no jestaun laboratoriu nian”, nia dehan.
ACLAM-TL rejeita profisaun seluk atu mai lidera laboratóriu saúde tanba konsidera la koloka ema ba fatin ne’ebé lolós.
“Karik la konsidera, ami-nia konferénsia ida-ne’e hodi altera nomeasaun ne’ebé iha mak ami membru asosiasaun iha Timor-Leste laran tomak hosi nasionál to’o baze sei foti asaun atu la kolabora ho lideransa foun ne’ebé hetan pose atu lidera laboratorio saúde ida-ne’e”, nia relata.
Nia afirma, ema sira ne’ebé mak atu simu tomada posse orsida lokraik atu troka lideransa laboratóriu ne’e sira laiha esperiénsia kona-ba servisu laboratóriu nian.
“Sira na’in-tolu mak atu mai hanesan diretór ezekutivu, ne’e ema médiku, diretór Patolojia Klinika Mikrobiolojia ne’e mós médiku ida, depois diretór tokjikolojia enfermeiru ida, entaun sira laiha esperiénsia ba laboratóriu ida-ne’e, oinsá atu jere servisu ida-ne’e ba oin”, nia haktuir.
Nia informa, ho ida-ne’e mak Ministra Saúde mantein nafatin na’in-tolu atu lidera laboratóriu mak ACLAM-TL, sei la koopera ho dirijente foun no sei halo greve, hahú hosi nivel nasionaá to’o iha baze.
Jornalista : Felicidade Ximenes
Editór : Zezito Silva
