Joven Lacluta inisiativa kuda ai-lia ektare ida
VIQUEQUE, 16 jullu 2024 (TATOLI)-Reprezentante Koodenadór Grupu Hadomi Futuru (GHF), husi aldeia Aidakara, suku Dilór, Fortunato Gomes Martins, informa, Lacluta poténsia ba setór agrikultura, nune’e joven sira foti inisiaiva hodi kuda ai-lia besik ektare ida, hodi reforsa ekonomia um-laran.
“Kuda ai-lia ne’e ami joven sira inisiativa rasik tanba ita haree rai poténsia, nune’e ami aproveita hodi halibur malu ho hanoin ida kuda ai-lia. Iha epoka ida-ne’e ami kuda ai-lia besik ektare ida, daudaun ne’e besik atu kolleta ona”, Koodenadór Grupu ne’e, hateten ba jornalistasira, iha postu Lacluta, ohin.
Koodenadór ne’e hateten kuda ai-lia ne’e fó rendimentu di’ak hanesan folin kada saku kilógrama 25 ne’e ho folin $18 to’o $20.
GHF hetan fini ai-lia husi komunidade Lacluta rasik ne’ebé hela iha área rurál, hafoin membru grupu sira bá sosa hodi haboot fali iha suku Dilór.
“Prosesu kuda ai-lia ami organiza malu bá hamoos du’ut, halo lutu hotu hafoin kuda, maske servisu todan, maibé fó benfísiu ba ita. Tanba kolleta hotu ami faan ba merkadu no ba parseiru sira hafoin osan sira-ne’ebé ami hetan balu sosa fali ai-moruk hodi rega du’ut no balun fahe ba malu”, nia afirma.
Grupu GHF ne’e la’os de’it kuda ai-lia, maibé distribui mós fini ai-lia ba komunidade seluk hodi kuda iha sira nia-toos.
Daudaun ne’e nia dehan, GHF koopera ho parseiru organizasaun internasionál Adventist Development and Relief Agency (ADRA) iha Timor-Leste hodi mai tetu direta iha GHF.
“Ami kuda ai-lia dezafiu maka merkadu, maibé agora ami hetan ona parseriu ADRA ne’ebé mai sosa ami-nia produtu ai-lia, depois sira distribui bá merkadu. Ami-nia esperansa ba oin hakarak dezenvolve ai-lia sai barak tanba merkadu garantia”, nia realsa.
Iha tinan 2023, GHF partisipa kompetisaun inovativu husi Institutu Apoiu Dezenvolvimentu Emprezariál (IADE) no konsege hetan fundu rihun $5 hodi reforsa atividade grupu nian.
Nune’e, Nia fó hanoin ba joven sira iha munisípiu Viqueque foti desizaun hodi dezenvolve setór produtivu sira, atu labele depende de’it ba produtu rai li’ur
Jornalista : Vitorino Lopes da Costa
Editór : Florêncio Miranda Ximenes
