MCI-UNCTAD prosede konsulta nasionál kona-ba komérsiu eletróniku
DILI, 16 jullu 2024 (TATOLI) – Ministériu Komérsiu no Indústria (MCI) no Dezenvolvimentu Komérsiu ONU (UNCTAD ) hala’o workshop hodi aprezenta deskobrimentu prinsipál hosi avaliasaun prontidaun komérsiu eletróniku no diskute kuadru estratéjiku Nasionál Komérsiu Eletróniku iha Timor–Leste.
Jerente Programa Rejionál, Dezenvolvimentu Komérsiu ONU, Chad Morris, hateten dezenvolve estratéjia nasionál komérsiu eletróniku Timor-Leste nian mak krusiál atu forma trajetória dezenvolvimentu nasaun nian. Entaun ho ida-ne’e hetan apoiu hosi Uniaun Europeia (UE) liuhosi Programa Ekonomia Dijitál Pasífiku (PDEP).
“Ami apoia Timor–Leste nia programa Komérsiu Eletróniku no Ekonomia Dijitál ho objetivu atu ekipaka ema sira ne’ebé halo polítika ho enkuadramentu estratéjiku no planu asionável atu hametin ekosistema komérsiu eletróniku no komérsiu dijitál Timor–Leste nian. Benefísiu sira ne’ebé antisipa inklui hasa’e komérsiu rejionál no internasionál, hamosu oportunidade empregu, fasilita komérsiu, haburas kresimentu ekonómiku no hadi’a meiu subsisténsia’’, Chad Morris informa ba jornalista sira iha Timor–Plaza, ohin.
Iha fatin hanesan, Vise Ministru Komérsiu no Indústria, Augusto Junior Trindade, dehan workshop ne’e atu konsulta nasionál ne’e ho objetivu atu halibur parte interesada nasionál no parseiru dezenvolvimentu sira hodi aprezenta deskoberta, diskute no sujere rekomendasaun husi Avaliasaun Prontidaun Komérsiu eletróniku Timor–Leste nian.
“Tanba ne’e, ha’u husu ba partisipante hotu atu foka ba workshop konsulta nasionál loron tolu nian hodi halibur komentáriu no informasaun komplementár ruma ne’ebé sei kontribui ba avaliasaun prontidaun komérsiu eletróniku nian’’, Augusto Junior hateten.
Nia haktuir, Estratéjia Nasionál E-Commerce sei hetan validasaun husi komité diretiva ne’e sei prezide hosi Ministériu Transporte no Komunikasaun molok submete ba Gabinete hodi hetan aprovasaun.
Workshop Konsulta Nasionál kona-ba E-Commerce ne’e fasilita husi Uniaun Europeia, ne’ebé sei hala’o durante loron tolu, hahú hosi loron 16 to’o 18 fulan-Jullu iha Timor–Plaza, partisipa hosi ministériu sira ne’ebé iha relasaun, parseiru no setór privadu mak hanesan Ministériu Agrikultura, Ministériu Turizmu, Ministériu Transporte no Komunikasaun, Ministériu Komérsiu no Indústria, Komérsiu Kámara Indústria Timor–Leste (CCI-TL) inklui setór privadu iha Timor–Leste.
Jornalista : Felicidade Ximenes
Editór : Zezito Silva
